《瞬間看地球》Stranger's Blog: 2021.08.31 Edinburgh (United Kingdom Day 01)

今日行程：
Arthur's Seat → St Giles' Cathedral → Scottish National Gallery → Thistle Cafe (Lunch) → Edinburgh Castle → Scott Monument → Edinburgh Old Town → Princes Street → Pizza Hut (Dinner) → Calton Road(Trainspotting 場景之一)

今日凌晨 0300 就要起身，預計 0430 出門口，咁樣 0720 前就到 Edinburgh 巴士站接阿朱~
我哋都係第一次出夜街，亦自然係第一次夜晚喺英國揸車~
凌晨時份，條街只有零星嘅車，非常爽，上到高速公路，啲街燈仲密過香港嘅高速公路，非常明亮~

不過原來只係一小段路係咁，行行吓就冇咗街燈，非常暗！
要喺條冇街燈嘅公路高速行駛，其實都幾刺激......
中間要離開高速公路，落一落市區，轉幾個彎，又再上返高速公路，由天黑揸到天光~

朝早六點幾，阿朱話佢已經到咗......但我仲有成個鐘車程，阿朱你慢慢等吓......

喺 google maps 睇，巴士站附近比較難搵位停車等或上人，不過慢慢搵都搵到嘅~
去到現場，嘩，完全唔係嗰回事，成個環境唔同晒，幸好，都搵到個位可以停吓又唔阻人嘅~

我哋未到嘅時候，阿朱就去周圍行吓，到咗先通知佢，所以都等咗一陣~
屎塔走去接阿朱，我就喺車等，接咗阿朱之後，我就去巴士總站去個洗手間先，都成三個鐘冇去過廁所~
返嚟之後，見到佢兩個食緊麵包~
噚日我喺超市見到麵包減價，£0.10 六個，嘩，抵到唔買唔得，同時亦預計阿朱落車後會肚餓，呢六個包可以當我哋三個人嘅早餐~
不過呢，啲麵包到期日係噚日......但我覺得過一日期唔會有咩問題，而且屎塔同阿朱係好熟嘅朋友嚟，呢樣唔會有咩問題~
我哋三個就喺車邊，一路吹水，一路食麵包~
吹夠水就起程~

今日第一站「Arthur's Seat」
好近市中心嘅一個山頭~

一起起步，即刻行錯路~
因為呢頭嘅環境，同 google maps 完全唔同晒，所以 google maps 帶我行嘅路，現實係冇嘅~
咁當然，最終都冇問題嘅~

不過世事就係咁，有時誤打誤撞，總有驚喜~
Google maps 帶我行錯一次，喺佢未能俾條新路我嘅時候，我行咗出大街先，到佢俾咗條新路我時，我又跟唔到，再次行錯~
咁驚喜位喺邊呢？就係因為我再次行錯嘅關係，佢俾咗另一條路我，而呢條路，係會經過電影 Trainspotting 嘅取景地，Calton Road，車上兩位女士異常雀躍~

驚喜呢，唔止係呢個......
去 Arthur's Seat，可以泊部車喺山腰嘅 Dunsapie Loch Car Park~
一開始做功課時，呢個 carpark 係唔開放嘅，直至出發前一日我再睇返，狀態改為開放，我就決定泊呢度，再行上山頂~
當我駛到轉上 Dunsapie Loch Car Park 嘅小路時，路口封咗，頂！打亂晒我嘅計劃，仲蝕咗成 £12！
冇啦啦講咩蝕咗 £12 呢？陣間再講~

泊唔到上山腰，頭先其實都經過一個停車場，而家嚟到呢度，邊度泊到就泊邊度啦，除非貴得好唔合理啫~
去到停車場，0830 先開始收費，而家係 0750，都試吓入錢啦，因為我哋 0830 肯定未返到落嚟~
由 0830 泊到 0930 先係 £1，抵泊，只係唔知點解俾極都俾唔到錢......
再試多幾次，終於俾到~

行上山條路，好易行，風景亦不錯~

唔知係咪太耐冇去旅行，個人一味淨係識向前行，行吓行吓就盪失路......
藉著 GPS 嘅引領，本應好易去到目的地，不過行極都係錯，最後，我哋終於望到 Arthur's Seat~
係望到，而唔係去到，因為我哋行錯路，越走越遠......
呢個時候，由於距離有點遠，大家都好似冇乜意思行返上去 Arthur's Seat 咁，就算吧~
不過可以話錯有錯著，而家咁樣，反而先影到 Arthur's Seat 個樣~

屎塔同阿朱嘅共同朋友 Fion，落咗 order 要我哋影天線得得 B 嘅草叢場景，所以喺回程落山時，不停尋找合適位置，試咗幾次，終於交到功課~

落返山腳，我哋轉去 St Margaret's Loch 嗰邊，因為嗰邊有鴨有天鵝，我哋又有麵包~

喺呢度抬頭向上望，就望到 Saint Anthony's Chapel Ruins~

今日餘吓嘅節目，都係步行嘅，咁就要處理咗部車先~
上網搵過啲停車場，都預咗貴，一早都知道 Edinburgh 市中心嘅交通繁忙，泊車位相對會少啲，少就會貴，定律~
我搵到個室內停車場，泊 5 - 24 小時 £18，係唔平咖，但出去玩，唔計較得咁多~
再睇真啲，咦，用佢個 app 好似九點前入車，£7 咋喎！正喎，如果我哋接完阿朱，首先去泊車，咁咪 £7 泊全日！
不過佢就寫得唔係好清楚，真係得個估字，唔知係咪真係咁樣~
我嘗試過上網查，查到官網個 Q&A 有講，不過真係睇完都唔明，佢個答案係講完等於冇講，講咩方便返工早咗到嘅你可以更彈性，咁點先可以符合要求先得咖！
官網有 online chat，不過問完都冇答我......
(後記：我問嘅時候係 2x/8，佢 7/9 send email 覆返我......)
後尾諗諗吓，其實都唔係好合邏輯，點解早過 0900 入車就會平咁多，諗吓諗吓就覺得冇咁大隻蛤乸隨街跳，再加上見到山腰嘅 Dunsapie Loch Car Park 開放返，就打消咗 0900 前泊部車入停車場先嘅念頭~
不過，當我去到個停車場入口時，見到佢個告示......

告示明確表示，0900 前入車，2359 前出車，£7！
我真係唔X明，點解官網唔可以寫得咁清楚？究竟你想唔想人知道呢個優惠？
我而家未夠 1000 入車，只係遲咗唔夠一個鐘，就已經要俾 £18 泊車，呢度蝕咗 £11！
今朝又上唔到山腰泊車，根本就應該嚟呢度泊咗車先，今朝又蝕咗 £1！
所以總共蝕咗 £12！
係需要用嘅，我唔介意俾，但其實我係可以唔駛俾呢 £12，一早知道個遊戲係咁玩法，我一定接完阿朱就過嚟泊車先！
我真係唔X明，點解官網唔可以寫得清楚啲？其實係咪唔想人知道呢個優惠？
£12 唔係多，但真係好揼心，好唔抵！

下一站「St Giles' Cathedral」

泊好車就行過去教堂，沿途建築相當美麗，怪不得 Edinburgh 能成為著名旅遊城市~

Edinburgh 有一條叫 Royal Mile 嘅街(並非實際街名)，東邊以 Palace of Holyroodhouse 為起/終點，西邊以 Edinburgh Castle 為起/終點~
我上 google map 計過，真係啱啱好 1 mile~
不過古城氣氛則以近西邊嘅一段路較為吸引~

近西邊嘅行人路，間中都有呢啲「閘口」，以我自己嘅感覺嚟講，有點影響市容，反正也只是一個標語，並非一個實質閘口，我個人覺得可以整好啲......
不過，可能呢舊嘢有佢嘅歷史意義，如果係嘅，保留佢喺度又好應該~

初時唔知邊度係教堂入口，繞咗一圈~
附近環境都唔錯~

St Giles' Cathedral

下一站「Scottish National Gallery」
Scottish National Gallery 入場免費，但事前都要上網預約先可以入~

沿路風景~

Scottish National Gallery

嚟之前已經聽人講過呢間畫廊比較細，有人甚至話 20 分鐘已經睇晒~
20 分鐘睇晒，咁真係好細喎......

門外門內都分別有工作人員檢查預約，即係要檢查兩次，先可以入到館內~
館內呢，細就真係算細，不過又未細到 20 分鐘睇晒嘅~

好多畫展都有 Italy ~ Venice 嘅畫像，我自己都幾鐘意~

我哋聽日就會去呢度~

展館雖小，但展品可觀性高，滿足了~

離開時，見到差唔多有十個人喺門口，個個人都用緊手機，相信係即場上網做預約先可以入場~

下一站「Thistle Cafe (Lunch)」
阿朱係屎塔朋友，我只係見過阿朱幾次，唔係太知佢為人，淨係知佢份人好爽直，但唔知佢對食嘢嘅要求，所以，出發前，都有揀定去邊間餐食嘢~
見面之後，傾開發現，佢食嘢比冇太大要求嘅我更冇要求，於是，我哋就隨搵嘢食，唔刻意去我事前選擇好，但有啲步程嘅餐廳~
行吓行吓，就嚟到呢間餐廳，睇完餐牌，就決定呢間~

沿途風景~

呢間餐廳有分樓下(basement)餐廳內，或者樓上地面，初時我哋揀樓下，亦因為想點嘢食，逗留咗喺樓下一陣，發覺樓下好焗，都係上返樓上~
本來唔想坐樓上，係怕唔叫都即造嘅雀屎，但係下面實在太焗，冇辦法~
上返地面，原來又冇乜雀喺上空飛過，咁都安心啲~

頭先喺樓下，侍應話會上嚟搵我哋，不過我哋都等咗有十分鐘，都未見人......
我記得有人話過，英國呢度，坐低後，侍應有時間就會過嚟，唔好舉手示意寫嘢，英國唔興咁樣~
所以，我哋都唔係太想催人，再等吓先~
等多幾分鐘，終於有人上嚟~

我哋求其叫咗幾樣嘢一齊 share~
Full Scottish Breakfast
(Bacon, Sausage, Egg, Potato Scone, Haggis, Black Pudding & Toast)
呢度有 English 同 Scottish 揀，咁我哋喺 Scotland，梗揀 Scottish 試吓，同埋都想試吓 Scotland 嘅 Haggis 同 Black Pudding~
Haggis 同 Black Pudding，味道有點濃，一啖 OK 的，第二第三啖其實真係唔多想食，好彩我哋三個人分，尚算頂得住~

Cheese Burger
普普通通，正常味道~

Baked Cheese Potatoes
呢個都幾好~

另外介紹咗 Irn Bru 俾阿朱飲~

下一站「Edinburgh Castle」
Edinburgh Castle 絕對係今次遊覽 Edinburgh 嘅重頭戲~
事關其實我自己覺得 Edinburgh 冇咩好期待嘅地方，主要係 Old Town 同 Castle~

Edinburgh Castle 門外係一個好大嘅廣場，可供泊車，我只係知道 staff 同 disabled 可以泊，遊客就一定唔得~
er......仲有雪糕車~

入場前，會有工作人員，先檢查係咪已經網上預約咗買咗飛，佢最主要係睇日期，日期啱的話，可以進入，再到右邊有部機 scan 個 QR code 先可以真正入場~

做功課嗰時，有個好大嘅疑問~
Edinburgh Castle 其中一個項目，係一點正嘅嗚炮，我幾相信第一次嚟嘅人，多數都會嚟睇~
而官網話遊覽路線會實施 one-way system，即係只能順住行，冇得行返轉頭~
而嗚炮嘅地方，就喺入場後不遠處~
咁嘅情況，咪多數人都會就住一點鐘嗚炮前，堆埋差唔多時間入場？
嗚炮後，咪成班人一齊跟住個 one-way system 一齊繼續遊覽？
咁樣真係好咩？對防止疫情有幫助咩？

路經有個平台可以望返出廣場~

繼續行~

差唔多到嗚炮嘅地方，有人群聚集~

由呢度望出去嘅風景~

上面都有個平台可以望到嗚炮~

嗚炮嘅地方~

差唔多到一點鐘，就有個著軍服嘅人，將炮彈放入炮台~

對時~

攪高個炮咀~

再次對時~
我身後有位女士話：「Just do it, Bob.」，接著便是一陣笑聲~

一時正，嗚炮~
好大聲，嗰吓真係有被嚇倒~

收返個彈殼~

其實呢，睇嗚炮嘅地方，已經冇咗 one-way system，之後嘅範圍都係自由活動~
所以嗚炮後，並不是一班人一齊前進，有啲停留，有啲向前，更多嘅係四散，唔存在我之前所預計嘅情景~
唉，仲等我計劃行程時，一定要就住 1230 入場，唔可以太早......

繼續向上行，行經一間賣 Whisky 嘅商店，阿朱有啲興趣，就入去行吓~
不過同一時間限八個人，所以都等咗一陣先入得~

行完商店，就行到去 Mons Meg~
呢支炮，可以將 150KG 嘅石球，射至 2 miles (3.2KM) 遠，難以想像！

喺呢度個平台，可以望到嗚炮嘅地方~

上圖見到地下有啲圈，唔知係一直都有，定還是為咗「社交距離」而設呢？
喺網上面搵到一張圖~

附近見有人排隊，唔知睇咩，我哋又排埋一份~
原來係 St. Margaret's Chapel~

行行吓又見到人排隊，唔執輸，排埋一份~
原來呢度係 Royal Palace and Honours of Scotland~

(室內禁止攝影，以上室內相片來自官方網頁)

之後就到 War Memorial~
我哋去嗰時正在維修中~

本身個樣係咁~

註：網上圖片

室內禁止攝影，以下相片來自官方網頁~

之後到 Great Hall~

之後到 Prisons of War~
下圖中，左邊建築物，主要入口係餐廳，入口右邊係 Prisons of War 出口，Prisons of War 嘅入口喺建築物嘅另一邊~

最後就行到去 National War Museum~

Edinburgh Castle 隨影~

離開城堡，返到廣場，見到左邊有座建築物都幾靚，嚟嗰時冇留意~

下一站......去一個重要地方，我深信，就算我唔記低，都唔會忘記~
去呢個重要地方時，經過一間 Pizza Hut，見到佢有 buffet，可以任食 Salad/Pizza/Pasta，我哋都好好奇，決定今晚嚟呢度食 buffet~ XDDD

下一站「Scott Monument」
喺 Edinburgh 市內好多地方，都可以望到呢座紀念碑~

我知道唔應該笑，但我真係忍唔住......

我哋喺紀念碑附近搵咗張長椅，坐低休息咗一陣先繼續行~

下一站「閒逛 Edinburgh Old Town」
Edinburgh Old Town 嘅氣氛係幾正，保存得好好~

Edinburgh Old Town 隨影~

最後，象徵式行咗一陣 Princes Street，一來 Princes Street 冇乜嘢行，二來其實大家都期待住 Pizza Hut 個 buffet~ XDDD

下一站「Pizza Hut (Dinner)」
喺閒逛嗰時，見到另一間 Pizza Hut，門口細過之前嗰間好多，細到我哋都懷疑有冇得堂食，就算有，又有冇 buffet 呢？
之後望過吓，有得堂食 buffet 喎~
我哋呢刻就要諗吓去邊間好~
最後決定去大間啲嗰間，或者可能有機會坐得舒服啲~