2024.01.30 千葉県 (柏、成田) (日本第十天)

今日行程：
【千葉県】Tokyo Hands 柏店 → トヨタレンタカー 成田空港(還車) → 成田空港(午餐)

今日下午就要搭飛機返香港，所以只剩朝早少少空閒時間~
嚟日本嗰晚只係行咗幾分鐘 Tokyo Hands，同冇行過冇分別，所以今日就補返 Tokyo Hands 嘅行程俾屎塔~

其實就冇邊一間真正方便，不過呢個景點，只許成功，不許失敗，就算點兜遠路都要去到~
我選擇咗 Tokyo Hands 柏店~

今日屎塔準備好出門嘅時間比預定仲要早，可見 Tokyo Hands 呢個行程有幾咁重要~
不過可能因為返工時間關係，交通非常繁忙~

呢個商場共有四個館，計埋停車場就五棟建築~
假設停車場係第一棟，Tokyo Hands 喺第四棟~
而棟與棟之間係有通道連接，不過通道就 10:30 先開，而家係 10:13~
咁當然唔等啦，只好落返地面出大街行過去~

屎塔大約行咗一個鐘，雖然我知佢行唔夠，不過如果佢再行就冇時間去食嘢~
俾錢時想搞免稅，不過今次搞免稅係要去專用櫃檯，好彩櫃檯喺行返去停車場嘅途中，唔駛兜路~
不過去到嘅時候，有兩個工作人員處理緊兩個客人嘅免稅，不過搞免稅應該唔駛好耐，就等吓~

喺等待嘅期間，見到有人拎張泊車飛嚟扱免費泊車，咁我當然唔執輸，搞免稅時俾埋對方搞~
搞完晒手續，對方除咗俾返張泊車飛我，仲俾咗張一時間延遲，咁應該係免一個鐘卦~
泊咗差唔多兩個鐘，出閘時係人手收飛，佢收完飛就話 OK，即係唔駛錢~
我刻意開車開慢啲，睇吓我有冇誤會佢，睇吓佢會唔會追返我俾錢~
但佢冇，即係真係唔需要俾錢，又會咁嘅~

睇返時間，還車前應該冇時間食飯，直去入油再還車~

還車時，工作人員打咗個電話，傾咗 5 分鐘有多，會係咩事呢？
佢傾完就俾張單我，正常嘢，係 TEP 唔包嘅高速公路費~
之後就搭穿梭去機場~

去到機場 check-in 完就去食嘢~
唔知係咩原因，冇咩想食，可能個人冇乜原因地冇乜胃口~
咁點都要揀樣嘅~
我揀嘅~
特上天ぷらうどん
喺冇胃口時食到好食嘅嘢，都可以覺得開心~
但喺冇胃口時食到唔好食嘅嘢，真係想掉咗佢算數~
呢兜嘢好唔掂，冇一樣好食，炸粉淋嘅，油膩感又重~

屎塔揀嘅~
和牛焼そば
成碟嘢油膩到不得了！
但牛肉本身又真係好食，雖然好油膩~