今日行程：
【宮城県】Toyko Hands 仙台店 → 武屋食堂 北目町店《住宿：仙台国際ホテル》
幾年冇喺香港機場食過嘢，今次喺機場搵食，唔知係我胃口一般，定真係冇咩啱食，好勉強先揀到~
而且味道都係一般而已~
到咗成田機場，插張電話卡睇吓用唔用到，等咗好耐都冇訊號，試咗好多方法都係唔得，唯有等到有 wifi 時再同對方聯絡~
入咗境就即刻去買飛搭新幹線去仙台~
我冇預先買定，係因為飛機有機會延遲起飛，咁就有機會搭唔到~
之前上網問過，啲人話好少會爆滿，但唔預先買定就有機會冇得一齊坐~
權衡輕重，都係決定去到先買~
去到櫃檯，說明來意，好快就買到飛~
去東京駅呢程就一齊坐，去仙台駅嗰程就要分開坐，都冇所謂嘅~
機場有 wifi，喺離開機場前同電話卡方取得聯絡，對方俾咗少少資料我哋，試過都係唔得~
而且傳訊息俾對方，對方都唔係好快就有回應，所以都冇得等，要去搭車先~
去東京駅呢程係搭 N'EX，車身寫明有 free wifi，不過上到車係極難連上，就算連得上都係上唔到網~
我試咗成程車，結果都係徒勞無功~
去仙台呢程係搭新幹線，終於都有穩定 wifi~
屎塔繼續同對方聯絡，我一邊繼續根據對方有限嘅資料去試，一邊上網查吓~
我諗試咗一個鐘到，終於連到上網！
不過只係 3G，超級慢！
等咗十分鐘到，由 3G 變 LTE，不過上網速度不變......
好過冇啦，希望只係地區問題......希望......
到咗仙台，而家係 9℃，仲落緊雨，唔係細嗰隻~
9℃......，真係有啲擔心今次旅程會唔會都係偏暖冇雪~
第一件事，去咗 Toyko Hands 先，閂 21:00，如果去旅館先再返過嚟就冇乜時間行~
點知，行咗一陣，就被告知夠鐘閂門了，原來係收 20:00......
我都仲有後備嘅，仲有機會去~
睇睇手機，似乎訊號正常晒，可以正常速度上網了~
而家就行去旅館 check-in 放低晒啲嘢先，再出去食嘢~
行去食嘢時，經過見到 Family Mart，就入去試吓撳錢~
第一次喺日本用呢張 debit card，有啲緊張~
入咗張卡，等佢 load 一陣，load 完話唔可以服務我張卡.....
佢部機寫明 Mastercard 適用，唔明點解唔得~
咁冇理由試一次唔得就算，當然有試多次啦，不過結果都係唔得~
附近仲有 7-Eleven，走過去試吓~
入咗卡，叫我選擇語言，好似有希望過 Family Mart，不過可能你入乜嘢卡佢都係叫你選擇語言先，純粹設計問題~
揀好語言，佢就開始 load，都 load 咗成廿秒，呢廿秒真係好緊張~
Load 完就有得揀查詢定撳錢，即係得啦，就撳少少現金試吓，係得嘅，掂！
而家就行去武屋食堂 北目町店，其實都係求其揀，因為唔多食店開到咁夜~
有圖睇，就懶得翻譯，點知叫錯咗~😆
味噌ホルモン焼き鉄板き定食
原來係豬內臟嚟，好彩我都食嘅，不過屎塔就完全唔食~
說實在就相當普通，同埋一碟入面咁多內臟有點吃不消，不過係日本嘅味道，所以都絕對 OK~
小豚汁定食
三陸産牡蠣フライ3個
ご飯、小豚汁、お新香付き
隻蠔好好食，外層乾身又脆，蠔好有蠔味~
個湯味道還可，不過飲完會有種好舒服嘅感覺~
食完嘢就去返 7-Eleven 買宵夜同撳多啲現金用~
之後就行返旅館~
沒有留言:
發佈留言