《瞬間看地球》Stranger's Blog: 2024.01.24 青森県 (十和田、青森) (日本第四天)

今日行程：
【青森県】タンポポ食堂(午餐) → 十和田市現代美術館アート広場 → 青森県立美術館 → A-Factory → おさない(晚餐)《住宿：アパホテル青森駅東》

一早起身就見到十和田湖活動方有電郵俾我，收到電郵嘅時間為 06:24，確認活動會取消，每日都有留意天氣嘅我，其實都預咗~
呢個活動係屎塔指定要去嘅，但其實我又唔覺得佢有幾期待~ XDDD

活動取消，即係有時間多啦，睇吓去邊好先~
噚晚我都有大約諗過吓，不過想改去嘅地方都係睇天氣，所以都係今朝先決定好啲~

選項之一，係上八甲田山睇樹冰，雖則我噚晚已經知天氣差，冇乜機會會去，但都要到今朝再確認吓~
唔好話介唔介意上到去會唔會因風雪而乜都睇唔到，係連上都上唔到去，今日纜車全日運休~

我決定食完早餐就去十和田市現代美術館先~

出門口時都有點大雪~

十和田湖マリンブルー
網上啲人話佢個蘋果批好好食，想嚟試吓，可惜，冇開門~

原定今日午餐嘅地點，食堂十和田家，都係冇開門~
可能天氣太差預咗冇生意~
向十和田市現代美術館方向行住先，邊行邊睇~

一路行，見到啲環境相當唔錯，我先醒起，我哋而家行經奧入瀨溪流~
做功課時，好想嚟，但冬天嚟講，係比較難~
一係步行，但步道喺冬天會關閉，有人話可以行馬路，我就唔會喇~
一係住星野酒店，有酒店嘅穿梭巴士載住客遊覽奧入瀨溪流，但大部份時間冇得落地，我又覺得冇意思~
一係揸車隨意停，我覺得呢個建議(網上係有人提議同話試過咁做，仲好意思放埋相)係相當不負責任，我當然唔會咁做，所以只好放棄呢個景點~

不過由於配合行程關係，我都係會行經奧入瀨溪流，只係冇刻意加入為行程之一~

中途，我記起有個銚子大滝，好似有停車位，就諗住停低部車行過去睇吓~
不過原來係入唔到嘅~
啲積雪深到呢~~~

之後經過見到白糸の滝~

同埋千筋の滝~

奧入瀨溪流隨影~

屎塔睇到沿途有個道之駅，應該有嘢食，所以而家就去呢個道之駅先~
可惜，撞正間餐廳今日唔開~

睇睇地圖，不遠處有間拉麵店，殺啦！
タンポポ食堂
一間非常家庭式嘅拉麵店~

店入面冇圖睇，我哋都係上 google map 睇圖，再俾店員睇~
我唔知係屎塔問題(相係屎塔隊俾人哋睇嘅)定邊個問題，嚟到唔係我哋想要嘅嘢，不過我哋唔係好挑食嘅人，真係食咩都冇所謂，同埋都煮咗囉，人哋肯換我哋都覺得唔好意思啦~
湯底同個麵都幾唔錯，係塊叉燒鞋咗啲~
我哋原本想叫有幾塊叉燒嘅麵，好彩而家得一塊，因為實在太鞋，錯有錯著~

向住十和田市方向行，越近十和田市，天氣就越好~
畢竟惡劣天氣主要喺西邊，十和田市喺東邊~

十和田市現代美術館本身冇停車場，要泊距離美術館幾條街嘅露天停車場，不過有泊車優惠~

入停車場時，冇卡提供，咁點樣可以攞到泊車優惠呢？
唔理啦，人哋自有一套方法，去到再算，攞唔到優惠都係有限錢啫~

泊好車，一出停車場範圍，風雲變色，大風大雪，啲雪係打橫打埋嚟，仲話東邊天氣好啲......

行到去十和田市現代美術館アート広場~

跟住就行去十和田市現代美術館~
館外都有啲嘢睇吓~

準備入館參觀時，見到呢張嘢~

吓？又唔開？
唉，可能我做功課做得太早，嗰時係未有資料~
不過我呢刻上佢官網睇，佢咁樣講真係好易令人忽略，可能要睇得好深入先會知佢呢個星期唔開~

唉，我係好刻意走過嚟，完全唔順路，只因屎塔話想睇~
嘥時間嘥油錢嘥埋停車場費！
度度都唔開，我都唔開……心呀！

好失望咁行返去停車場~
返到停車場，研究咗好耐而家去邊好~
最後決定去青森美術館先，之後去旅館放低部車，再去 A-Factory(屎本來想去，但冇時間，所以本身冇加入行程入面~)

青森美術館，我個人冇乜興趣，不過屎塔話想睇奈良美智展，所以就嚟參觀吓~
睇完之後，無論係展館本身嘅恆常展覽定奈良美智嘅展覽，我自己都係冇乜興趣~

青森美術館，最出名嘅，可能係佢~

參觀完青森美術館，就去旅館 check-in 放低行李，放低埋部車，行去 A-Factory~
經過ねぶたの家ワ・ラッセ(睡魔之家)，不過冇打算入~

A-Factory

見到呢個告示，真係嚇死，又唔開？哦~~~原來係講二樓間餐廳啫~

A-Factory 原來冇咩嘢睇，主要賣蘋果酒同蘋果產品~

見到有雪糕賣就買咗杯~
350 円，會唔會太平呀？仲幾好食添！

不過呢，店員好似好唔願意做咁，呢個係我哋喺日本好少遇到嘅態度~

見到呢個蘋果批，好想買嚟今晚食，不過個批要雪嘅，我哋而家又準備去食飯，即係而家食又唔係，今晚又唔係，就冇買到~

行完 A-Factory 就行去食晚餐~
今晚安排咗去食おさない，算係有點期待嘅一餐~
主打食帆立貝，係人氣長龍店，每晚 19:30 截龍，想食嘅嘢仲可能會賣晒~

去到果然有人龍，不過條人龍算好短，唔似得網上面講嘅要排超過一個鐘~

原來而家 19:00 截龍了~

我哋算好彩，等咗一陣，條龍長咗一倍，遲啲嚟可能真係要排一個鐘~

排隊嘅時候有個小插曲~
有個男人喺隔籬樓梯碌咗落嚟，屎塔最近佢，想話扶吓佢，不過對方笑住不停講大丈夫，唔似好傷，屎塔亦只好採觀望態度~
期間有個男人走過嚟，應該都係睇吓有咩可以幫手，不過傷者都仍然係婉拒協助~

過嚟幫手嘅呢個男人，係咁同我哋講日文，又指指條樓梯上面，我哋同佢講聽唔明，對方轉而講英文~
佢話，樓上 menu 同樓下一樣，唔駛排隊，呢個係秘密嚟~
佢仲不停打手勢示意「請」，好熱情，好似要睇住我哋上去咁~
講真，唔係話信唔信嘅問題，而係，我哋只係嚟一次(至少呢次旅程)，條龍又唔係真係好長，我哋都唔想之後不停諗，會唔會本身嗰間好食啲呢？
再講返信唔信嘅問題，明顯排隊中有本地人，唔通佢哋都唔知？
所以最後我哋都係尷尬地婉拒佢嘅好意~