今日行程：
【宮城県】トヨタレンタカー仙台駅西口店(租車) → 松島さかな市場 → 南部屋(午餐) → 松島 → 田代島 → 【岩手県】源喜屋 盛岡店(晚餐)《住宿：アートホテル盛岡》
落雨落雨，係咁落雨，睇天氣報告，今日會落足一日雨~
本來今日安排咗去仙台朝市行吓同埋食早餐，不過屎塔有啲唔舒服，想瞓多陣，所以就冇去度~
咁我就自己落去便利店買啲嘢返房一齊食~
差唔多時間就行去トヨタレンタカー仙台駅西口店租車，過程非常順利，俾咗部 Yaris 我哋~
今日時間有啲緊，因為臨時改咗行程~
出發前，阿珊 post 咗田代島嘅相，好多貓，搞到我都好想去~
之前冇安排係因為啲船嘅班次好唔理想，但睇完佢分享嘅相又好想去，我當然都知道屎塔一定好想去~
反正今日嘅松島......唔好話雪，唔落雨都偷笑啦~
冇雪嘅松島，我就真係冇大興趣~
本來今日係松島+猊鼻渓作主打，不過冇雪加落雨關係，不去也罷~
不過去田代島之前有啲時間，而且係順路，所以都會過松島速遊一吓~
沿途隨影~
(後記：今晚唔記得 backup 車 cam 張卡，張卡本身又唔係大容量，所以今日啲車 cam 片冇晒，不過真係唔可惜，天氣太差，冇咩景觀可言~)
嚟到松島，我哋去食嘢先~
喺松島さかな市場，有燒蠔放題，本來都有啲興趣，但諗起單一咁不停食蠔，其實食到幾多隻？
唔係食量問題，係胃口問題，應該好快食到唔想食~
呢度就係食燒蠔放題嘅地方~
都係入個市場，睇吓有咩其他嘢食~
地下有魚生飯，不過想食啲熱嘢，上一樓睇睇~
上面有熱嘢食，我呢個選擇困難重症者，好難先決定到食咩，點知間嘢原來未開......
Menu 右上角寫明 10:00 開，而家係十點幾，所以先企定定喺度揀~
到想埋去點嘢食時，見到上面個掛牌，寫住開 11:00，妖~~~
還好，我有後備食嘢嘅地方，不過就算冇都唔緊要，喺日本要食合胃口嘅嘢太容易~
就算去返地下食魚生飯都絕對 OK~
出發前見到有人推介げんぞう，就去睇吓~
不過去到發現都唔係咁啱食，就再去其他後備食店~
(後記：原來相都冇影過......落雨係咁，乜都唔想做，淨係想坐低食嘢~)
南部屋，都好多人推介，係好多遊客都會去嘅食店~
かき丼セット
かき丼、焼きがき、かきフライ、みそ汁、小鉢、お新香付
嚟南部屋，都係想食佢個三食蠔，純綷貪心，想一次過食幾種煮法嘅蠔~
燒蠔
呢個係我得最普通嘅，冇乜蠔味~
炸蠔
外層唔係炸得幾好，唔夠乾身，蠔味就還可以~
第三種唔知係咩煮法，好似蠔豉咁嘅，呢個又幾好味，不過純粹係佢個醬汁，蠔味都係一般~
海鮮丼
マグロ、ウニ、いくら、ホタテ、甘えび
感覺都算新鮮，雖唔覺好鮮甜，但仍然好食~
食完嘢就出去行吓~
松島為日本三景之一，確實係有佢嘅魅力，不過以今日嘅天氣，又風又雨，咩魅力都給掩蓋了~
我哋都冇乜興致，匆匆望兩眼影張相叫做到此一遊~
通向福浦島條橋封閉咗，想行吓都冇得行~
途經間舖頭，門外有 Hello Kiity，吸引咗屎塔入去~
入面有件蠔 T 好鬼正~
見到個日本三景展望台，不過據網上面資料，現不開放，而且都見唔到上面有人~
松島，蜻蜓點水，到此一遊之後，就去田代島，日本貓島之一~
上船地點喺石巻門脇発着所，到達嘅時候，勁大雨，真係好灰~
希望田代島嘅天氣冇咁差啦~
買飛時，工作人員告知今日隻船唔會停大泊港，只會停仁斗田港~
我本身個計劃係大泊港入島，仁斗田港離開嘅，不過都冇所謂嘅~
買好船飛就行去碼頭~
船到喇，都唔細喎隻船~
呢個碼頭，得我哋兩個上船，船上面有大約七個乘客，相信佢哋都係喺上一個碼頭上船的~
而我不知道上一個碼頭，石巻中央発着所喺邊......
今日有啲風浪，咁大隻船都拋得好利害，我好似冇搭過船拋成咁~
我本身好易暈浪，今次嚟田代島係有啲即興，冇醒起要準備暈浪丸，唔知陣間會唔會嘔呢~
(後記：我唔單止冇嘔，連暈都冇，好神奇！)
島上面其實都有啲自然景觀睇吓嘅，不過我哋嚟田代島，只為貓而嚟，再加上根本冇時間行晒成個島~
就住船嘅班次關係，我哋大約有兩小時喺島上面~
到咗仁斗田港，雨勢冇嗰邊咁大，咁都好啲，唔係點喺大雨中捱兩個鐘~
離開碼頭就已經見到貓，兩隻咁多~
有雪的話，該有多美~
行到呢度，我哋完全冇留意牌上有「多、少」兩個字，係我寫遊記呢刻先發現~
根據二揀一，我永遠揀錯嘅定律，當時揀咗右邊......
喺地圖上見到貓神社，就向住呢個地方行，可能會有好多貓聚集~
一路行都係呢啲路~
到咗貓神社，原來係咁樣......
而家，要決定之後點行~
一係行去大泊港，但時間上比較緊迫，因為我哋最終要行返去仁斗田港搭船~
一係沿路兜個圈返仁斗田港，但又怕冇貓......
為咗唔想太趕路，都係行返落仁斗田港再搵貓好了~
喺貓神社向仁斗田港方向行，開始見到貓嘅蹤影，而且仲好似好多添！
呢度就正正係阿珊 post 出嚟嗰張相嘅地方，誤打誤撞就嚟到~
呢度叫島のえき，係餐廳嚟，不過今日冇開~
唔知係咪因為落雨或者天氣凍，佢哋都唔係好活躍~
喺度都逗留咗好耐，都要預返啲時間行返去仁斗田港~
喺我哋離開時，有兩隻貓跟住我哋，唔知佢會跟到我哋去邊~
一路行，有另一隻貓向住我哋行嚟，跟住又跟我哋一齊行，即係佢行行吓遇到我哋就掉轉方向行~
如是者經歷咗四次，總共儲咗六隻貓一齊行，勁搞笑~
(圖中只顯示到五隻)
不過行行吓就有啲唔跟喇，最尾得返兩隻~
其中一隻係由一開始跟我哋跟到而家~
不過跟跟吓都冇跟了，仲諗住一齊行去碼頭~
全程可能都跟咗一公里~
差唔多到碼頭，收到電郵，係十和田湖活動方傳過嚟~
佢問我聽晚住邊(因為我 book 咗個活動係後日朝)，因為當日朝可能大風，有機會要取消~
佢想睇吓我聽晚住得近唔近，再睇吓幾時做決定~
如果住得近，佢可以最後一分鐘先決定，反正我人都喺附近~
的確，我聽晚住嘅地方非常近佢，佢可以嗰朝早先決定都得~
當佢得知我住得好近，佢話 24/1 08:30 會決定取唔取消~
今朝阿珊 post 咗段新聞，今季最強寒流會喺星期四到達，會有警報級大雪~
真係天公做「美」，你唔想要雨嘛，好，俾多啲雪你......
有雪唔係唔好，但太多雪，輕則影響行程，重則影響生命，這可不是說笑的~
不過都唔到我哋控制，見步行步，隨緣吧~
喺田代島呢度，大部份時間落雨，所以都冇點影相，但總算有滿滿嘅回憶~
搭返回程船，返到碼頭就開車去位於盛岡嘅住宿~
設定好車入面個導航，時間比 google 嘅時間長，但由於我哋唔趕時間，都冇深究，反正啲導航係咁，一路行一路變~
不過越行越唔對路，好似反方向咁行嘅？
仔細啲睇，真係反方向去返松島方向......
佢條路線係去返松島再屈返上北面，雖則全程高速公路，都唔係咁戇居呀？
出發前睇到有五條路線，揀咗條最快嘅，估唔到佢會咁行，真係唔知點解，我唔覺得咁樣真係快啲，嘥咗勁多時間~
而家喺高速公路，已經行咗一段時間，如果離開高速再研究，陣間又帶我行好多燈位嘅路，未必有著數，唯有錯落去~
Google 俾嗰條路係正常好多，仲諗住本土跟車嘅導航會好啲~
一路上都係滂沱大雨，飛咗兩個鐘都係咁落大雨，心真的很累~
屎塔話佢生咗粒好大嘅痱滋喺條脷度，非常痛，所以去到盛岡市，經過藥妝店，就入去搵啲合適嘅藥~
除咗藥，仲買咗其他嘢，最後埋單三千幾円，對方告知買滿五千五円可以有免稅~
又去揀過~
再揀過佢都話唔夠，明明夠吖~
原來係免咗稅後五千五円~
又去揀過~
今次夠喇，登記咗護照，佢就用個專用嘅免稅袋入住~
上咗車，見到袋上面寫「Do not open」，即時意會到，出境前都唔可以拆袋......
其實入面有兩樣嘢係想喺日本用……
今次係我哋第一次搞退稅，完全冇概念，但事已至此，再算吧~
去到旅館放低晒嘢，就行去源喜屋 盛岡店食晚餐~
屎塔點咗杯紅茶，不過唔小心倒瀉咗~
唔知道佢哋會唔會上過另一杯俾我哋~
我知道，會咁做就人情，唔會咁做就道理，我只係想知會唔會啫~
過咗一陣都冇再上過，唯有點多次~
白金豚しゃぶしゃぶ鍋
上檯嘅時候真係好意外~
Menu 係咁嘅~
上檯時係咁嘅，得五片~
我都唔會期望有 menu 上面咁多，咁係好唔現實~
但得五片？好似少咗啲~
不過佢有得加錢再添加，如果好食的話就加~
結果，我覺得好普通，唔覺好有豬味，唔會再加了~
白金豚ロースカツ
外層炸得唔錯，不過肉就有點乾，同喺九州食過嘅爭一截~
講真，今晚呢餐，食碗拉麵可能仲滿足啲~
伏又未到嘅，食前有啲期望啫~
食完嘢，行經便利店，買埋宵夜及明日早餐就返旅館~
今日真係落足一日雨，就算我哋揸咗兩個幾鐘頭車，相距唔知幾多公里，仍然係落緊雨，係咪成個東北都落緊雨？咁樣落雨法，真係煩死人~
不過嚟緊可能會落警報級大雪，一樣令我憂心......
沒有留言:
發佈留言