今日行程：
【青森県】青森魚菜センター(早餐) → 高山展望台 → 高山稲荷神社 → 大正浪漫喫茶室(午餐)《住宿：駒ヶ岳温泉》
呢兩日嘅行程完全被天氣打亂晒~
噚日去唔到八甲田山，今日呢刻，網頁都係顯示纜車暫不運作~
同噚日唔同，噚日係全日運休，今日係每小時更新~
不過上面天氣都唔好，就算佢運作我都唔會上~
今次無緣上八甲田山了~
(後記：今日纜車都係全日冇運作過~)
本來今日去嘅青森県立美術館，噚日去咗，八甲田山又上唔到，計劃好今日會去嘅地方，一係去咗一係去唔到，咁要搵啲地方去吓~
研究完一輪，反正今日冇咩好做，又唔想為咗攝時間而去ねぶたの家 ワ・ラッセ(睡魔之家)，我決定去遠少少~
有兩個地方，我本身都好想去嘅，但因為唔多順路，所以冇加入行程~
一個係高山稲荷神社，一個係鶴の舞橋~
再加埋去弘前食蘋果批作午餐~
弘前距今晚旅館有點遠，所以食完午餐就去旅館，今日行程就此搞掂~
本來今日嘅午餐係去青森魚菜センター，但因為我決定咗去高山稲荷神社，之後唔會再返嚟青森市，所以就決定而家去~
旅館最遲 10:00 check-out，出去食完早餐返嚟先 check-out 都算好鬆動，咁就唔駛揸部車出去要顧泊車問題~
行過去嘅時候，見到地面不停有水流出，相信係鹽水嚟，防止路面結冰~
青森魚菜センター
青森魚菜センター嘅特式，係以票代錢，即係用錢買咗票先，再去唔同檔口以票換食物~
170 円有 1 張票，2000 円有 12 張票，雖然一次過買 12 張票係抵啲，但其實都只係慳咗 40 円，吸引力唔算大~
不過一場嚟到，一於一人買 12 張票，感覺上盡興啲~
呢度大約有廿幾檔，但唔係檔檔都收飛賣即場食嘅食品，有啲係真係海鮮檔口，收現金賣海鮮~
賣即場食嘅，唔同食品收唔同數量嘅飛，不過我印象中都只係見過收一張同兩張，好似冇見過再多啲~
其中有一檔賣蘋果汁，老闆勁識做生意，我哋行過，佢即刻遞上兩小杯蘋果汁俾我哋試飲~
見咁細杯(一啖都冇嘅份量)就試飲吓，就算飲完唔買都唔會話唔好意思~
點知，飲緊第一杯時，佢就已經斟緊第二杯，同之前嗰杯唔同嘅~
如是者，前後佢斟咗四次共八杯，我哋示意夠了，佢先至冇再斟~
喺咁嘅情況下，唔買真係好衰仔~
再講，其實係好飲嘅，又唔係特別貴，我哋每人買咗一樽~
好少見一大條咁完整嘅八爪魚鬚，好靚~
用晒 12 張票之後嘅成品~
屎塔嘅~
我嘅~
兩個字，鮮甜！
2000 円，真係超抵食！
食完早餐就行返旅館，check-out 同攞車~
而家向高山稲荷神社進發~
沿途天氣時好時壞~
到達時，見能見度唔太低，就上高山展望台先~
不過見到條斜路咁斜，加上有雪，仲唔知底層會唔會係冰，放棄揸車上，步行上算~
上到去，唔知係咁啱刮大風雪，定係因為高處夠開揚本身就大風，上面情況係有點惡劣~
既然都上到嚟，當然會上去~
上去呢個展望台，係為咗可以睇到高山稲荷神社嘅千本鳥居，不過上到嚟先知，係睇唔到嘅~
呢個展望台，唔係 360 度，只有 270 度，千本鳥居個方向，就係喺嗰個展望唔到嘅 90 度~
係咪有人功課做得唔好？嗰個人嘅解釋係，喺 google maps 入面，呢個展望台嘅入面，有一半相都係千本鳥居，咁好自然就以為呢個展望台係可以望到千本鳥居~
呢個解釋好合理，唔合理嘅係放相嗰啲人，亂咁嚟！
而上面睇到嘅景就......
好失望好失望，唯有寄望神社入面有好景觀~
行返落去高山稲荷神社，天氣比之前差咗好多~
我哋並沒有好仔細咁遊覽神社，主要都係為佢個千本鳥居而嚟~
嚟到千本鳥居嘅位置，非常靚！
沿住鳥居行到頂，原來有個觀景台~
呢度就真係可以望到千本鳥居全景~
上咗嚟唔係好耐，就開始刮大風同落冰雹，係落好細粒嘅冰雹，仲要係兜口兜面打橫咁打埋嚟，我哋基本上係背住個景，一秒都唔望得~
強忍痛楚咁影咗幅相，啲冰雹不停打橫咁打埋塊面度~
等咗好一段時間，我哋覺得真係未必等到佢停，唯有背住個風向咁行~
行完神社，可以去鶴の舞橋，亦可以去弘前食蘋果批~
不過由於時間關係，不可兩者兼得~
鶴の舞橋，有雪同冇雪都有不同嘅美，不過，呢段時間正在維修中，觀景可能會被破壞，而且，其實都唔係咁順路~
再講，都要食午餐嘅，所以好快就決定揀去弘前了~
隨意從網上搜來鶴の舞橋嘅雪景相~
喺弘前，有非常多地方可以食到蘋果批，甚至有「弘前蘋果派導覽地圖」~
眼花撩亂，求其揀好了，我相信都會好食~
就求其揀咗去大正浪漫喫茶室~
佢有七款蘋果批，七款唔同口味~
其實咁樣係設個坑俾自己踩~
我已經選擇困難症末期，揀完去邊間，去到仲要揀要邊個批......
大正浪漫喫茶室，位於藤田紀念庭園內，而個停車場位於整個庭園嘅西北方，喫茶室則位於庭園嘅東南方，泊好車要行最少六分鐘，雪地的話，應該仲要耐啲~
去到個停車場，一架車都冇，真係有啲猶豫泊唔泊入去好，但唔泊呢度又唔知泊邊，當然最後都係泊喺度算~
藤田紀念庭園 • 大正浪漫喫茶室
食咗正餐先~
チキンピラフ (Chicken Pilaf)
雞肉係炭燒嘅，好香~
個飯個汁都幾好味~
カルボナーラ (Carbonara)
個意粉就普通，個汁唔算好 creamy~
到主角蘋果批了~
七款入面有兩款暫不提供，即係五選二~
屎塔揀咗凍嘅~
ないすらいふ (Nice Life)
佢中間嗰啲透明啫喱，我本身就唔鍾意食~
可能因為滿口都係我唔太喜愛嘅啫喱，瞬間已經冇咗個期待感，冇話覺得好好食~
我就揀個熱嘅~
タムラファーム (Tamura Farm)
上檯已經聞到蘋果香~
外層焗得夠酥脆，內裡蘋果微酸，酸甜度好啱我，非常好食~
大正浪漫喫茶室入面個環境都好靚，氣氛相當之好~
不過當時有人喺度，就費時影相~
(以下圖片來自 google maps 入面嘅相~)
再加上窗外庭園風景，恰好落下飄雪，意境十足~
今晚住溫泉旅館有一泊二食，唔可以太晏到，否則我食完蘋果批，一定出去行吓個庭園~
之前又唔知有呢個庭園，否則應該會將佢加入行程中~
到達駒ヶ岳温泉時，都近六點了~
Check-in 時，有問我哋會唔會搭 20:00 穿梭巴士去第二個溫泉，而我哋本身係唔知有呢個服務或者有呢個溫泉~
我哋一心只想去貸切溫泉，所以就話唔需要喇~
咁樣仲好，有部份人搭穿梭巴士去第二個溫泉，咁呢段時間，貸切溫泉被佔用嘅機會或者時間就會少咗~
(後記：查返資料先知，原來穿梭巴士係去頂頂大名嘅「乳頭温泉郷 鶴の湯温泉」，不過我係唔會去大浴場嘅，所以對我嚟講係冇損失，屎塔就......)
晚餐嚟講，啲嘢又幾特別，唔講得上好好食，可以話係合格有餘，但就冇乜嘢係特別出色~
根據晚餐見到嘅人，計埋我哋，得四檯，總共七個人，再加上應該有人會去鶴の湯温泉，再再加上呢度有兩個貸切溫泉，我哋相信，20:00 ~ 21:00 呢段時間，應該冇乜人用個貸切溫泉~
食完飯，休息咗一陣就沖涼，沖完涼就落去貸切溫泉睇吓有冇人~
呢度嘅貸切溫泉，走廊會有燈，溫泉入口亦有燈，只要有著燈，就代表有人用緊~
落到去，兩盞燈都冇著，代表兩個溫泉都冇人用緊，非常好~
兩個貸切溫泉，一個叫岩の湯，一個叫木の湯~
我哋入咗岩の湯先~
(以下原圖來自官網，再以線上 AI 放大工具放大~)
浸完出嚟，見隔籬個木の湯都冇人浸，又走過去浸咗一陣~
岩の湯就冇乜景，但木の湯係喺條溪隔籬，流水淙淙，視線範圍內都係積雪，加上天空飄著細雪，可謂完美~
(以下原圖來自官網，再以線上 AI 放大工具放大~)
沒有留言:
發佈留言