藻岩山展望台 → 札幌白色燈樹節 → Garaku Soup Curry(晚餐) 【旅館：Hotel Mystays Sapporo Aspen】
原本嘅計劃係，到埗後就去旅館 check-in 及放低行李先，不過班機遲咗起飛，咁當然就遲咗到北海道，所以就只好跳過呢個步驟，將行李寄存喺札幌車站先~
寄存好行李，就去綠色窗口買定今次旅程需要預先買票嘅 JR~
今日第一站「藻岩山展望台」
十年前，因為冇乜自遊行經驗，只係睇一本旅遊書就當聖書，盡信書中嘅一切，但當時書裡面所講藻岩山纜車嘅營業時間，其實係夏令時間(書中並沒有提及夏天與冬天時間會有不同)，而冬天係會早幾小時停止營業~
就係因為咁，搭唔到纜車上山，而巴士亦因為路面結冰而停駛，最後係上唔到山~
當然，我自己係有責任，所以，經一事長一智，之後計劃行程都會睇多幾本書，同埋上官網睇營業/開放時間先係最正確做法~
十年後再次嚟到札幌，無論如何，我都一定會安排上嚟藻岩山！
而且，而家嘅藻岩山，已經係日本新三大夜景之一，相信非常有可觀性~
上藻岩山，可以由市電ロープウェイ入口駅，步行上纜車站，或轉乘免費穿梭巴士~
步行定搭車，我哋決定睇運氣，就有車到就搭車，否則就步行~
結果去到車站，睇睇時間表，知道好快就有車到，所以最後就搭穿梭巴士上纜車站~
上藻岩山嘅纜車有兩段，其中第二段，可以有其他選擇的，包括：
1. 24-seat All-terrain Snow Vehicle
2. 16-seat Norwegian-made Sled
3. Snow Bus
我哋原先係想搭 24-seat All-terrain Snow Vehicle，類似鏟雪車咁嘅~
不過可惜，我哋因為航班延誤而遲咗到埗，以上三款特別交通工具，今日都已經停止營運~
咁冇計啦，只好搭第二段纜車上山~
山頂非常寒冷，不過好在有屎塔，衣著方面嘅功課，佢做得非常之好~
除咗塊面同除手套時，全身都唔覺凍，唔駛著到隻糉咁都好夠暖~
係對鞋就爭啲，但呢樣唔關屎塔事，係我貪平啫，但其實都頂得吓嘅~
藻岩山嘅夜景相當不錯，不愧為日本知名嘅夜景~
本來係想搭呢種鏟雪車上嚟，過咗載客時間，就做返本業，鏟雪~
欣賞夠就搭返纜車落山~
下一站「札幌白色燈樹節」
其實呢個景點就冇咩特別嘅，不過反正經過附近，就行過去睇吓~
附近幾條街都有，不過就冇乜變化，都係咁樣，就冇周圍行嘞~
下一站「Garaku Soup Curry(晚餐)」
札幌名物，湯咖哩，呢間比較多人推介~
去到門口，有幾個人排緊隊，照排啦~
望真啲，入面仲有好多人排緊......
不過我哋之後都冇嘢做，所以就照排~
越排就越凍，好似仲凍過喺藻岩山，可能因為唔郁嘅關係~
我哋後面有個女仔竟然仲可以著短裙，真心佩服！
排咗可能都有一個鐘先到我哋~
佢人気 No.1 嘅係豚角煮湯咖哩，不過賣晒~
都唔緊要嘅，我哋一心想試佢個湯咖哩啫，叫其他湯咖哩都可以~
やわらかチキンレッグと野菜
(Chicken & Vegetable Soup Curry)
另外加咗個細飯加芝士~
ポークフランクとベーコン の炙りチーズのせ
(Pork & Vegetable Soup Curry)
另外加咗個細飯加溫泉蛋~
湯咖哩係幾香，意外地唔會越食越膩~
其他配菜都有水準，真心不錯~
食完飯，飽飽地就行一個地鐵站去攞返行李，再行去旅館~
沒有留言:
發佈留言