羊ヶ丘展望台 → 新千歳空港
坐咗一晚夜車，有點辛苦，主要唔係坐/躺/瞓嘅問題，係真係太熱，始終唔太習慣長時間喺開咗暖氣嘅環境~
屎塔都瞓得唔好，除咗因為熱，亦都因為佢搵唔到個掣去挨低張椅，係生物嘅問題定死物嘅問題就唔知喇......
本來計劃好去「中央卸売場外市場」食早餐，不過我哋胃口都唔係幾好，可能因為瞓唔好啦，決定唔去喇~
而家六點幾，好早，就喺火車站慢慢搞吓梳洗同寄存行李嘅事情~
今日下午 16:00 機離開日本返香港，所以基本上只得朝早嘅時間可以去玩~
今日唯一一個景點就係「羊ヶ丘展望台」
羊ヶ丘展望台，除咗係展望台，仲有啲戶外活動，不過具體係啲咩就唔太清楚~
去羊ヶ丘展望台，要搭一程地鐵，再轉一程巴士~
我哋去到巴士站，見未夠鐘就去便利店買啲嘢食先~
上到去展望台，仲有幾分鐘先開門~
呢個展望台，最著名嘅就係呢個人像，同埋呢句說話~
呢個係資料館，主要講述冰雕展嘅資料~
曾經嘅冰雕作品，全部係大型作品，普遍都有 15 米高，好勁！
呢度係羊之家，只係見到羊嘅屁股......
今日試咗一樣嘢，從來未做過，亦冇諗過會做嘅事，就係滑雪！
呢度個場分兩個，一個其實係俾啲唔識滑雪嘅人體驗吓，另一個就長啲同斜啲嘅，但其實都係小兒科~
下圖中，START 牌轉左就係體驗場，直落嘅就係滑雪場~
體驗場好細，微斜，但絕對足夠俾初心者玩吓~
人生第一次滑雪，比想像中難，第二圈比第一圈好，玩完兩圈已經好攰......
之後走咗去玩滑道，不過呢個滑道設計上就爭啲，個個都係瀡到中間就再瀡唔到落去......
我哋兩個人，如果單人滑，可以叫另一個推你落去，咁雙人呢？本來諗住自己手腳並用划前啲等佢自由滑落，不過我哋未出手，後面個女仔已經推咗我哋落去~ XDDD
玩到夠皮就去等巴士，見未夠鐘又走去商店買雪糕食~
羊ヶ丘展望台隨影~
返到札幌駅，攞返行李就搭車去新千歳空港~
機場勁多人，又熱又焗~
排隊過安檢時，遇返當日獨自去玩雪地飄移個男仔~
原來佢喺最大雪嗰日揸車落去函館，不過當日好似係東部最大雪，南部好啲嘅，冇咁危險~
過咗安檢，又冇乜胃口，就冇去食嘢~
冬天去北海道，有好有唔好~
交通就最麻煩，但雪景下，處處都係美景，非常正！
期待再有下一次嘅冬之北海道~
沒有留言:
發佈留言