知床五湖 → 道の駅ウトロ(午餐) → 知床流冰 → Yakiniku 網走ビール館(晚餐) 【通宵巴士：北海道中央バスドリーミントオホーツク号】
早晨呀！
雪景，就係冇咩景嘅時候都可以覺得靚~
今日 join 咗 day tour，分兩部份，一朝早一下午，午餐自己搞掂~
07:50 要準備好喺大堂等人嚟接，而旅館早餐 07:00 先開始~
所以，我哋決定，07:00 前就要執好嘢，寄存好行李同 check-out 埋，咁 07:00 就輕輕鬆去食早餐~
噚日態度好差嘅前台係位女士，今朝嘅係位男士，態度正常~
喺 check-out 途中，噚晚嗰位女士出現，佢同個男嘅講咗一陣嘢，再咀妙妙咁望一望我哋，如果當刻佢係講：「佢哋又想點？」，係完全配合晒佢嘅表情同動作~
但當然我唔會知佢講咩~
咁，其實佢做咩呢？
我哋噚晚嚟，check-in，上房，食晚餐，完全冇多餘嘅行為，再講返轉頭，其實我哋一到埗佢已經咀妙妙，所以同我哋做過啲咩都冇乜關係~
今朝就 check-out 同寄存行李，全部都係一般旅客做嘅事，我自問絕對係個有禮貌嘅旅客，我真心唔明究竟咩事~
話之佢，唔理啲無謂人~
早餐好普通，又唔算豐富~
食完嘢見仲有啲時間就出去行吓~
差唔多時間就返旅館等導遊嚟~
導遊嚟到，對好資料就叫我哋上車~
但係呢刻未見廣州嗰兩位朋友(早餐時見過佢哋)~
司機等咗一陣都唔見就上車，仲開埋車~
可能佢哋嚴格執行逾時不候......
我哋見佢車都開埋，就同佢講，仲有兩個未上車~
導遊話登記人在酒店冇入住記錄，所以唔等~
竟然係咁嘅原因！實在太意外，我哋即時都俾唔到咩反應......
會唔會係搞錯嗰個係我哋呢？可能佢哋唔係跟呢架車，名單上等嘅人根本唔係佢兩個？
直至佢去咗第二間酒店接其他人，我哋不厭其煩再同佢講，我哋識嗰兩個人，佢哋現在就喺旅館，想麻煩佢可唔可以再返去睇多次~
導遊拎個 list 俾我哋睇，指住登記人嘅名，問係咪佢哋，但其實我哋都唔知佢哋叫咩名~
總之，我哋表達咗俾佢知，有兩個人有參加，而且現在就喺旅館，佢返唔返去都好，人哋有人哋嘅規矩，唔返都冇辦法，盡晒力~
導遊再開車就掉頭，想必一定係返返去~
到咗旅館門口，我哋見到佢兩個喺大堂，安心晒~
不過初時佢哋都冇相認，因為導遊一入去就行去前台，形成佢哋係背對背，我正想落車協調之際，佢哋相認喇~
事後問返，原來旅館登記個名同 day tour 登記個名唔同，所以導遊誤以為登記人並無入住呢間旅館~
車上有八個客，有六個都係嚟自大陸的，唔識嗰四個係講普通話嘅~
我哋八個人當中，有啲人裝備唔係咁合適，要喺導遊辦公室更換再出發~
車去到一處地方有道閘，上面寫住通行禁止，現場唔只有一部車，似係等齊晒就開咗度閘，等幾部車過晒再閂返~
一路繼續行，都行咗好遠吓先停車~
停好車，導遊好認真咁講，地面好跣，要非常小心~
點知，第一個落車嘅大叔，一掂地嗰吓已經跣，腳向前跣，上半身仲喺車上，最後跣到整個人瞓咗喺地下，大叔笑住企返起身，冇事就好~
導遊係五十幾歲 nice guy，整體上不錯~
唯一一樣嘢唔夠細心，而我覺得係必需嘅，係開始前要提團員先上洗手間，嚟緊兩三個鐘冇得去，應該提一提啲人去咗先~
雖然，大家都係成年人，呢啲嘢係唔需要人提，唔好將個責任拋俾人，但作為導遊，我係覺得有責任~
導遊逐個幫我哋著 snowshoe~
呢種 snowshoe，踏上雪上，非常實在，平地的話，係完全唔跣，斜路則未知~
不過，操作上係需要時間適應，同普通步行唔同~
同埋係好難倒後行，最好都係轉身 180°C 代替倒後~
顧名思義，知床五湖，係有五個湖，我哋行藍色嗰條路線，即係比較長嗰條，就會經過全部五個湖~
沿途都會見到一啲動物留下嘅痕跡，不過動物本身就見唔到~
熊嘅抓痕~
啄木鳥啄成嘅洞~
仲有不知名嘅小動物足跡~
導遊叮囑大家一定要跟住佢行，唔可以走開，因為湖邊隨時有危險~
佢就即場示範俾我哋睇~
佢話雪唔係太深，一踩落去就到冰層，而冰層唔係好厚，好有機會一踩就裂，一裂就有機會掉落冰水~
危險嘅仲有呢啲被雪覆蓋咗嘅小橋，一不留神行咗落啲窿度就好容易受傷~
另一個例子，又係會隨時踩爛冰層而導致受傷~
導遊見到垃圾就會執起~
途經斜坡，佢喺背囊拎咗啲大膠袋出嚟，每人一個，俾大家墊住瀡落斜坡~
中途休息時，又派 Royce 朱古力俾大家補充體力~
行到尾聲就去到觀景台，喺觀景台上，望出海面，見到好多流冰~
知床五湖嘅雪，極為鬆軟，同我自己接觸過嘅其他地方嘅雪唔同，好特別~
呢個行程真係超級正，白茫茫嘅世界，仲好似走咗去野生動物嘅屋企咁~
可惜今日多雲，時陰時晴，陰嘅時間較多~
知床五湖隨影~
完成咗知床五湖旅程，還返對 snowshoe 俾導遊，上返車，逐一車返我哋返旅館~
途中見到山上面有黑熊，不過喺車入面，仲要唔係坐車頭，就影唔到相了~
除咗黑熊，仲見到海面有超多流冰！
今日個 day tour，分兩部份，兩部份可以只參加其中一個~
而車上面嘅八個旅客，全部都係參加咗兩部份嘅 day tour~
初時我以為下午都係呢八個，不過喺車上面點名時，原來其中一對人下午嘅行程，預約咗 13:00~
呢對預約咗 13:00 嘅，返到旅館，剩返半個鐘午餐時間都未必有......
其餘三對人，就預約咗 15:15，中間有成差唔多三個鐘，夠晒鬆動~
返到旅館，就行去「ウトロ漁協婦人部食堂」食午餐~
沿途風景~
行到去ウトロ漁協婦人部食堂，冇開......
呢頭疑以近海，不如周圍探索吓，睇到大海就睇到流冰，反正我哋時間非常充裕~
於是我哋就向住堤壩方向行~
去到一處好似船廠咁嘅地方~
呢度已經勁多流冰~
呢度係防波堤以內嘅地方，啲流冰就喺大海漂到入嚟~
我哋繼續向前行，行經一啲唔係路嘅路，其實好危險，完全唔知雪下面係乜嘢，地形如何，好易受傷，我哋每步都好小心~
穿過呢堆亂石，到咗一個停車場嘅地方~
前方有條樓梯，感覺似係一個觀景台，就走上去睇吓~
一上到去，啞了！
一望無際嘅流冰，壯觀！
喺觀景台上面，啲風吹埋嚟真係唔係普通嘅凍，頂唔到好耐就要落返下面~
附近風景~
我哋喺下圖左邊嚟，回程就行馬路，穿過隧道離開，唔想再行返嗰堆亂石~
出咗隧道，見到呢舊石，幾特別~
之後就要搵嘢食，行吓行吓就行到去道の駅ウトロ~
見到入面有嘢食，唔諗喇，就呢度啦~
「麦王」の豚丼(肩ロース)
海老天ぷら蕎麦(1尾)
味道不錯，合格有餘~
食完嘢就周圍行吓~
行行吓就落雪，仲越落越大~
差唔多時間就行返旅館~
廣州朋友而家唔知喺邊呢，係咪享受緊呢場少少大嘅雪呢~
不過咁樣落雪法，真係有啲擔心下午個「知床流冰」活動會取消......
知床流冰呢個活動，主要係著住件 dry suit，隨意浸落冰水度~
Dry suit 保暖亦防水，同時因為 dry suit 內充滿空氣，所以係非常浮，唔會浸親，唔駛識游水~
時間差唔多到，雪亦細咗好多~
導遊到喇，不過唔係今朝嗰個，點名後就出發~
一車八人，全部都係同一間旅館嘅，車嘅座位亦只得八個，真係啱啱好~
今朝有三對人都係參加 15:15 嘅知床流冰，但其中一對唔喺車上~
咁我相信係就返同一間旅館嘅一齊就方便啲，反正呢度啱啱好有八個~
八個人，有我哋兩個，廣州嘅朋友兩個，另外有四個講普通話嘅大媽，佢哋係一齊嘅~
呢幾個大媽......嘈到呢......
車去到一處路邊地方停下，眾人就地換 dry suit~
穿著 dry suit 係一件幾麻煩嘅事，自己一個基本上好難完成~
著好 dry suit 後，私人物品可以拎埋去，亦可以放車~
但其實拎埋去係好麻煩，亦唔會有人幫手睇住，導遊係冇責任的~
所以最後唯有放車~
相機呢，一樣，要拎就自己負任，導遊自己有個防水袋，可以放喺佢度，但講明唔會負任何責任~
明嘅，如果咁都要導遊負責，搵鬼做啦~
最後我哋只拎一部手機作為影相之用~
Dry suit 有個位可以放到手機，不過放同拎都有困難，咁嘅情況下，喺流冰上拎出嚟時，可以想像到，跌落水嘅機會都幾大......
所以我哋都係將部手機放喺導遊個防水袋度~
離開馬路，就向海邊進發~
好快就行到有流冰嘅地方~
零距離接觸無邊際嘅流冰，好正！
開始行上啲冰度，幾跣吓，導遊仲要行得鬼咁快，完全冇理過我哋......
嗰幾個大媽真係好嘢，真係寫個服字俾佢哋~
佢哋行喺冰上如履平地，瘋狂自然地擺 pose 影相都仲行得快過我哋......
去到目的地，導遊踩上舊又大又平嘅冰，再踩落啲碎冰度，成個人直插咗落水，但就用雙手扶住舊大冰，佢係有意圖咁做，並非意外~
其後就叫我哋跟住佢做~
之後就係自由時間，俾我哋自己任玩~
流冰活動，於我而言係非常正嘅一件事，我自己唔鍾意玩濕身遊戲，但著住套衫落水又唔濕身，仲要好浮，係好自在又有安全感嘅一回事~
可惜，我哋影咗幾張相，手機已經冇晒電~
氣溫越低，電子器材耗電越快~
我哋本身冇諗住用手機影相，所以都冇話要準備滿電嘅手機~
其餘六個人，由到達現場開始，不停影相，佢哋都係用手機，究竟佢哋舊咩電嚟，咁鬼勁嘅！
不過人哋每人一部手機，我哋二人得一部，仲要唔滿電，冇得比嘅~
廣州嗰兩位朋友好好，知道我哋手機冇電，義不容辭咁話幫我哋影相~
影自己嚟講，唔太需要，但呢刻係好值得記低嘅時刻，所以都有要求幫忙影幾張~
我哋最主要想影景，但又冇可能叫人借部手機俾我哋咖嘛~
所以只好請求對方，遲啲俾相我哋嘅時候，夾多幾張純風景相，對方亦毫不介意一口答應，真係好多謝佢哋~
所以呢編所有關於知床流冰活動嘅相都係來自廣州呢對朋友的~
曾經存在過喺呢遍望唔到盡頭嘅流冰堆中，絕對係非常難忘嘅時刻~
個導遊就普通，一直都目無表情，而且唔算太理我哋，喺嚟同走嘅時候都係勇往直前，喺咁危險嘅環境下都好少回頭望吓我哋~
嗰四個大媽，由開始就嘈，嘈到尾都仲嘈緊，但係睇到佢哋嗰種歡樂，其實又幾開心~
返到部車度，就地除返件 dry suit 俾導遊，再由導遊載返我哋返旅館~
返到旅館，睇睇時間，仲有兩個鐘先夠鐘搭車返網走~
天又黑晒，附近要行嘅都行過晒，就去便利店求其買啲嘢食，打發吓時間~
同廣州朋友傾開，知道我哋今晚會坐夜車返札幌，佢哋話，前日上網先知有呢班車，見仲有兩個位剩，已經即刻買，但到買嗰時只剩一個位，所以就搭唔到嘞~
原來佢哋連聽晚嘅旅館都仲未訂......隨興到咁樣我真係接受唔到......
Hea 到差唔多夠鐘就行去巴士總站等車，我哋同廣州朋友搭同一班車去網走~
去到網走就正式同佢哋道別~
之後我哋喺巴士總站寄存行李，再行去「Yakiniku 網走ビール館」食晚餐~
我哋有 1 小時 40 分鐘，可以慢慢食~
特選セット(特選套餐)
・黒毛和牛特上カルビ(肋骨)
・上牛タン(牛舌)
・和牛特選ヒレ肉(里脊肉)
・上牛サガリ(內橫膈膜)
・道産黒毛和牛ザブトン(北海道黑毛和牛)
・焼き野菜(烤蔬菜)
肉汁豐富，口感不錯，但牛味一般，不過都滿足到呢刻想食燒肉嘅心情~
盛岡冷麺
冷麵幾好~
食完嘢就行返去巴士總站等巴士~
今晚呢班係通宵巴士，22:40 網走開車，06:00 到達札幌~
唔知點解我完全冇諗過有劃位呢回事，一上到車就隨意坐低，結果當然係坐咗人哋個位，真係唔好意思......
搵返預約文件，睇返我哋個坐位編號，再搵返個位置，我同屎塔個位係一最前一最後......
我已經係一開售就買票，買完再睇返，都只係售出兩張，就算系統更新得慢，我都幾肯定我係頭幾個買票嘅人，咁都買唔到相連位？
定係電腦編位係一定將識嘅人分開，等你哋唔好有交流，咁就唔會嘈到其他人？
咁冇計啦，我諗最後未必有得挨後，冇理由要屎塔坐，梗係我坐啦~
走到我個位度，都試吓啲掣啦，吖，原來最後排都有得挨喎，正~
第一次搭通宵巴士，感覺幾得意~
沒有留言:
發佈留言