《瞬間看地球》Stranger's Blog: 2018.03.04 北海道 ~ 網走 (日本第六天)

今日行程：
北浜駅展望台、停車場(午餐) → オホーツク流氷館(鄂霍次克流冰館) → レストランホワイトハウス(晚餐) 【旅館：網走　ホテルオホーツク・イン】

今日早餐係旅館包埋，自助餐形式，不過我同屎塔超冇胃口，唔知係咪噚晚食滯咗~

今日第一站「北浜駅展望台、停車場(午餐)」
北浜駅，據稱係日本境內最近鄂霍次克海嘅車站，冬季時，有機會睇到滿海都係流冰，非常壯觀~

本來諗住係去唔到，因為呢條線係期間限定，上年行駛時間冇去到三月四日咁遲~
今年我預咗冇，行程計劃好晒，旅館交通都訂好晒先見到佢出時間表，最後行駛到今日，即係三月四日~
左砌右砌先度到時間可以去~
亦因為咁樣，由川湯呢度去北浜駅，有點棘手~
首先預約咗車由川湯去網走，但網走只可以去到道の駅流氷街道網走~
去北浜駅係要由鐵路站網走駅搭鐵路，變咗中間呢程要搵車接駁~
搵車接駁唔難，呢度有部巴士非常適合旅客乘搭~
但要就啱時間，仲要處理行李就比較麻煩~

成個過程係咁：
1. 川湯 → 網走(道の駅流氷街道網走)
轉車時間有 15 分鐘，要做嘅包括：寄存行李、買巴士一日券(観光施設めぐり１ＤＡＹパス)、搵巴士站
2. 道の駅 → 網走駅
轉車時間有 27 分鐘，看似鬆動，但其實心情係有點緊張，因為呢程車不設網上預售，即係有機會買唔到，就算買到，亦未必坐到理想位置，所以係越早買越好，而家只係比開車時間早廿幾分鐘先買飛，絕對算係遲~
3. 網走駅 → 北浜駅

上車地點喺大鵬相撲記念館，未夠鐘就周圍行吓~

時間差唔多就行去相撲記念館~
去到唔見有巴士，一度懷疑去錯上車地點，但係又冇理由，大鵬相撲記念館喎，點會去錯~

等咗陣，突然聽到有人叫我個名！
喺日本點會有人叫我名呀？係咪聽錯？
我望向聲音來源，有個男人望住我，咁就走埋去睇吓咩事~
原來對方係司機嚟，佢駕駛嘅唔係巴士，係私家車 Alphard Hybrid~
可能人數太少，開巴士過嚟成本太高卦~

我哋上車時，已經有兩個乘客喺車上面~
呢兩個乘客，中途已經落咗車~

沿途風景~

車上面只剩我哋兩個乘客，其實我心思思想叫司機車埋我哋去網走駅，反正佢係私家車，彈性大好多，咁我哋就方便超級多~
不過諗諗吓都係費事麻煩人，真係當人哋係你私人司機咩，book 嘢時講好邊度落就邊度落啦~
最後當然都係冇開口~

到咗道の駅，比預期早咗 15 分鐘，我有個想法~
本來轉車時間有 15 分鐘，再加巴士車程約 8 分鐘，而家早咗 15 分鐘到，即係距離原先到達網走駅嘅時間有 38 分鐘~
我覺得夠我哋急步走過去旅館放低行李先，之後再算~
一於咁話~

去到旅館，交待一切，放低行李就離開~
而家，我可以返去道の駅等巴士，搭巴士過去網走駅；亦可以步行十五至二十分鐘走到網走駅~
以我哋急步咁行，後者似乎嚟得快捷同簡單~
一於咁話~

網走呢度積雪一樣多，而且今日暖咗好多，好多雪溶晒，一地都係思樂冰同埋水~

行到網走駅，比原本計劃早咗五分鐘~

由於回程轉車時間都係非常緊張，要喺七分鐘之內，由月台跑上地面再跑去巴士站，所以而家要兵分兩路，我去買飛，屎塔去視察巴士站位置~

我哋早到呢五分鐘，看似好少時間，但其實非常重要！
我嚟到嗰時，車站人唔多，我成功買到車飛，仲同屎塔匯合埋排到較前位置~
我哋開始排隊無耐，人群湧入，我知喇，呢啲人群都係搭巴士過嚟，如果我本身係搭巴士過嚟，就會同佢哋同一班車~
真係好彩！

我哋搭嗰班列車叫「流氷物語号」，月台仲有吉祥物歡迎乘客~

雖然坐到想坐嘅位，不過沿途風景普通，最失望係冇乜流冰，畢竟今日氣溫回升，有成五六度，乜冰都溶晒啦~

到咗站，一望向海，都係乜冰都冇，睇睇手機，顯示溫度有成 10°C，咁高溫？我又唔覺喎~
噚日 0°C，聽日又預計係 0°C，但而家有成 10°C 咁奇怪？

流冰呢，就喺北方漂落嚟嘅，海面冇晒冰係咪同溫度有直接關係就唔清楚喇~

列車到咗之後，會停留 10 分鐘，之後繼續行程~
由呢班列車到站起計 90 分鐘後，有另一班列車，係回程返網走嘅~
即係，我哋一係喺度停留 10 分鐘，之後去其他地方，豐富行程；一係喺度停留 90 分鐘，之後返網走~
的確，兩班車都唔理想，10 分鐘實在太少，對之後嘅地方亦沒有多大興趣；90 分鐘又嫌多得滯，冇咩做~
不過，我係點都唔會揀 10 分鐘，太過匆忙喇~
所以呢，我哋有 90 分鐘嘅時間喺度慢慢遊覽~

自然，頭 10 鐘我哋係唔會上去展望台，我哋大把時間，人哋得 10 分鐘(其實唔夠)，無謂上去阻住人~
就留喺車邊影吓相~

列車離去，帶走咗九成嘅人，而家我哋就可以慢慢行上展望台，欣賞風景~
呢度冇流冰都好正，有的話真係錦上添花~

車站嘅候車室都被貼滿來自世界各地旅客嘅名片~

其中有一張，特別起眼~

另外，呢度有間餐廳，叫「停車場」，評價一般，不過反正我哋有咁多時間，能夠喺呢一個咁美麗嘅地方，坐低食吓嘢，享受呢一刻嘅寫意，食物嘅質素，已經唔係咁重要~

ビーフカレー
(Beef Curry)
還可以~

いもだんご(お茶付)
(Baked Potato Ball and Green Tea)
呢個唔好食......

Hea 到咁上下又上返展望台，等車到~

下一站「オホーツク流氷館(鄂霍次克流冰館)」
オホーツク流氷館喺每年嘅一至三月，有條「流氷絶景スライダー(流冰絕景滑道)」，我哋係為此慕名而來~

搭流氷物語号返到網走駅，我哋有七分鐘轉乘巴士，由於今朝搭少咗一程巴士，變相逐程買票比買一日票平，所以就唔駛走去買一日票~
今朝視察咗巴士站喺邊，我哋目標清晰，唔駛七分鐘就到達巴士站等車~

好快就有巴士到，不過唔知點解佢冇入嚟我哋呢個站度，而係直去......
我諗，我哋去錯咗巴士站......
天呀，錯過咗一班車，要等 30 分鐘先再有車......
等唔係問題，問題係咁樣就唔夠時間參觀オホーツク流氷館......

我哋望住部巴士走，但我哋又知道網走駅呢度一定有站，個站會唔會喺前面呢？
前面冇車又未到燈位，點解部巴士會著 brake 燈呢？
唔理喇，追！
部巴士喺前面埋站，有人上車，不過我估計我哋都係追唔到~
不過，唔好放棄，只要巴士未開車，我哋都仲有機會~
冰雪地面上追巴士，這是用生命來作賭注吧~ XDDD
本來呢，就追唔到咖喇，不過喺巴士前方有人跑上嚟，巴士司機等埋佢，就係咁，我哋就上到車，幸運！

好快就嚟到「オホーツク流氷館(鄂霍次克流冰館)」

嚟到就有個壞消息，我哋慕名而來想玩嘅「流氷絶景スライダー(流冰絕景滑道)」因較早前嘅惡劣天氣，需要整修，暫不開放！

冇得玩滑道，就睇吓個館有咩睇啦~

呢度室內長期維持喺 -15°C，入去之前，每人獲發一條濕毛巾~

入到館內就可以體驗吓由一條濕軟嘅毛巾，揈到佢變成一條乾硬嘅毛巾~

入面嘅場景佈置~

離開時嘅毛巾回收處，條條都咁堅挺~ XDDD

跟住就去睇天使魚，幾有趣~
世間生物真係好奇炒~

其他館都係介紹吓啲自然氣候同環境，興趣不大~

之後就上天台，有個天都山展望台~
風景不錯~

館外有條小滑道，係為小朋友而設~
啱啱嚟嗰時仲見到有小朋友玩緊，而家就關閉咗~

館後有個影相框~

臨走前買咗杯海鹽雪糕，幾好食~

之後就搭返巴士返旅館~

去到旅館 check-in，前台告知行李已經放咗喺房內~
呢啲額外嘅服務真係令人感到窩心~

網走市中心真係冇咩地方好行，就喺旅館休息吓~
休息到六點半，覺得肚餓就行出去食嘢~

我哋本來諗住去「花のれん」食寿司嘅，不過去到冇開~
門口有塊牌，純睇漢字的話，估佢意思係下午三時後有要事暫停營業~

條街好靜，死城咁，想搵間仍在營業嘅食店都唔係咁易~
行咗幾個字先搵到一間仍在營業又啱胃口嘅餐廳~
呢間餐廳叫「レストランホワイトハウス」，直譯意思就係白色房子餐廳~
營業至晚上八時，現在係七點，冇問題啦~