2018.03.03 北海道 ~ 阿寒湖、摩周湖、弟子屈町 (日本第五天)

今日行程：
阿寒湖 → 摩周湖第１展望台 → 旅館(晚餐) → 摩周星紀行 【旅館：お宿　欣喜湯 (旧川湯ホテルプラザ)】



今日早餐都係旅館包埋，普普通通，冇乜特別~
食完早餐就出去阿寒湖玩吓雪上活動~

噚晚冇得玩雪上電單車，所以今朝首要目標就係雪上電單車~
我哋本來諗住玩最長嘅 10000 米，不過可能因為積雪問題，唔開放~
而家最長只可以玩到 4000 米，都冇計啦，照殺~

雪上電單車嘅操作非常簡單，俾油去，落 brake 停，平穩而有速度感，好玩！
屎塔揸得勁快，我踩盡都只係跟到，唔係追，絕對冇可能追得到佢，我相信佢都已經踩盡~

去到一半，我哋見起步位都仲未有人嚟玩，就停咗一陣，影吓相~

影完相先發現原來我整甩咗個保險掣，部車死咗火！
開始玩之前，我係有睇住檔主點樣撻車嘅，我憑住記憶嘗試撻返著佢，試咗幾次終於著得返，真係好彩！

我哋玩完，返到起點，嘩，已經有超過二十人等緊出發！
好彩早嚟，否則要等之餘，仲唔可以行得太慢甚或停低~

阿寒湖上隨影~

今朝散步行程取消咗，時間太多，而有興趣嘅雪上活動已經玩過，就周圍行吓，自製散步行程~

暴風雪過後，積雪滿街~

有雪人，亦有雪......熊？

商店未開，條街冇乜人~

咁樣清雪真係好有效率，一次過就可以將地上嘅積雪放到泥鬼(或者呢度可以叫雪鬼？ XDDD)度，即刻運走~
街尾仲有幾部雪鬼等緊，頭嗰部滿咗，離開，後面嗰部就即刻走上嚟裝雪，非常高效率！

喺某個角落，見到幾隻貓~

行吓行吓就嚟到愛奴村~
同樣，商店未開，冇乜人~
對藝術中心就冇乜興趣，略過~

斜路行上嚟容易，落就比較危險，隨時跣低~

原先計劃係喺愛奴村食個早午餐，不過先唔講未有食肆營業中，其實我哋亦都未有胃口~
食就好閒，晏啲先再算~

等到仲有大半個鐘就夠鐘上車，我哋走去便利店買咗兩件三文治，當午餐，食埋先上車~

車到咗，有位小姐落車點名，呢個站得我哋上，車上面一個人都冇，未夠鐘就開車，目的地係川湯溫泉~
導遊小姐提我哋扣安全帶，仲睇住我哋扣好先去返自己個位，真係俾個 LIKE 佢~

講起呢班車，有啲奇怪，純車程只需個幾鐘，但根據佢嘅時間表，要成三個鐘，唔知點解，我曾經奢想，佢會唔會都係有地方停留俾我哋遊覽吓呢？
我做功課嗰時真係冇印象佢有呢啲安排，或者係我太集中喺目的地同上落車時間，中間嘅嘢忽略咗~
如果可以去返噚日去唔到嘅摩周湖第１展望台就好了，發夢吧......

部車一路行，我間中留意吓地圖，睇吓佢點行，去到分岔路，佢向摩周湖第１展望台方向行，咦，可能有機會夢想成真喎！
點知結果真係，正！

摩周湖，係一個唔容易結冰嘅湖，喺冬天，群山都披上白雪，但湖水呈湛藍色，非常美麗~

不過，雖然意外地可以補返嚟呢一度，但摩周湖結咗冰，冰上當然係被雪覆蓋住，咁就睇唔到湛藍色嘅湖水同群山披上白雪所呈現嘅美景~
不過其實就咁睇，環境都係相當不錯嘅~

呢度仲有間小商店，又係買雪糕食嘅時候~
買咗中間呢種口味，味道......唔識形容，主要係清爽中帶點甜味咁~

上返車，又唔知係咪仲有其他地方去，同樣係因為佢預計嘅到達時間，比實際時間長好多~
結果，中間再冇其他地方，再次停車時，已經到達旅館，比預期早咗大半個鐘~

我會嚟川湯，最主要原因係佢有個「摩周星紀行」嘅觀星團~
我就唔識睇星座，亦唔識聽日文，只係貪佢可以帶我哋到一處冇乜光害嘅地方睇吓星~
呢個團同之前然別湖嘅差唔多，但然別湖嗰個叫散步團，冇講有咩做嘅，到咗先知係觀星，今次呢個講明係觀星~
其次，川湯都係一個知名嘅溫泉地方嚟，就帶屎塔嚟浸吓~

早咗到川湯，就搵啲嘢做吓，附近可以去嘅，可能只有「大鵬相撲記念館」
但實情我哋對呢個地方興趣不大，只係冇咩地方去就過去行吓~

不過出咗旅館，就被附近環境所吸引，都係周圍行吓吸引過去相撲記念館~
旅館對開就已經有個足湯~

喺呢度遇到有個伯伯，佢主動同我哋傾偈~
當伯伯知道我哋來自香港，就話佢以前都去過香港，當時香港不是中國的~
傾咗幾句，伯伯浸完足湯就離開~

附近有啲雪雕~

有熊出沒注意嘅警示牌~

一路繼續行，就行到去「大鵬相撲記念館」
坦白講，如果唔駛錢，攝吓時間嘅話，可能都會入，但如果要俾錢就真係免了~

之後繞第二條內街行返旅館，又遇上幾隻貓~

經過川湯神社~

條街好靜，冇乜人，其實咁樣行吓都幾舒服~
差唔多時間就返旅館食晚餐~

今晚嘅晚餐，我哋加咗錢升級做毛蟹餐~
呢盤嘢入面有毛蟹有魚生有牡丹蝦有凡立貝~
全部都好正，鮮甜~

其他嘢就普通~

食完飯就差唔多時間上車，開始摩周星紀行~
初時計埋我哋得四個人上車，去到另一間旅館，有成廿幾人上車，我見佢哋身上都有同一張 label，應該係旅行團嚟，而且仲應該係我今日喺旅館見到嘅小冊子入面介紹過嘅兩日團~
觀星地點，我哋今日都去過，就係摩周湖第１展望台~

可惜今晚多雲，月亮又好光，睇到嘅星星唔算多~

平時睇到嘅星星，影出嚟係咁樣，一個個星球咁~

兩粒星加一堆雲霧，似卡通版飄飄嗎？

睇完就上返車返旅館，完結今日行程~