今日行程：
【滋賀】彦根城+玄宮園 → 比内地鶏ほっこりや夢京橋店(午餐) → 八幡山展望館 → La Collina → 嬉酔 くわ乃(晚餐)《住宿：ホテルルートイン草津栗東-栗東インター国道1号-》
早餐旅館包埋，好普通~
彦根城
彦根城是日本現存十二天守之一，具有極高歷史價值。它不僅是日本的國寶五城之一，更以其優雅的建築與四季分明的庭園美景聞名。
彥根城完工於 1622 年，由德川家康的重臣井伊氏歷時約 20 年建成。 其天守閣融合了多種建築風格，是少數躲過廢城令與戰火侵襲、完整保存至今的木造城郭。
去到彦根城停車場，阿姐指示我泊最近入口嗰個位，通常有得揀我都唔會揀呢啲位，啲車出出入入係咁經過，仲要係轉角位，被撞風險比其他位置都高，不過佢叫到就泊啦~
佢講咗一大輪日文，我只係識聽一級棒，有咩咁棒呢？
彦根城好細，可以話一眼望晒~
佢的確係幾靚幾優雅，只可惜我哋喺全年最唔靚嘅時候嚟，好處係人唔多~
遊覽天守閣時，對腳板相當痛苦，因為進入前要除鞋，地板溫度相當低，入面亦當然冇得坐，對腳板係凍到痛~
去到西の丸三重櫓時，情況更甚，我強忍痛楚，遊覽完就即刻由頂樓怱怱衝落地下著返對鞋~
我決定衝落地嗰刻係已經到達到臨界點，係真係頂唔順，反而屎塔話都唔係咁凍啫~
我前面有對年老父婦，同我哋掉轉，男嘅好似冇乜嘢，但睇個女嘅步姿就知道佢係同我一樣，已經頂唔順~
睇得出個女嘅都係衝緊落樓，但始終有啲年紀，動作唔會快，同埋行呢啲建築，好多時都係啲斜度好大嘅樓梯，我自己都快唔到，莫講話佢哋~
我心入面祈求佢哋會讓我哋行先，結果當然係冇啦，個女嘅都想盡快衝落地下，仲點會讓人~
我而家知點解停車場個阿姐話嗰個位一級棒了，原來喺彦根城可以離遠望返部車~
其實都唔係好棒啫，不過阿姐又未必係咁諗嘅~
屎塔落呢啲樓梯時拗柴，好彩唔嚴重，休息一陣都仲行到~
彦根城隨影~
玄宮園
玄宮園是一座大規模的池泉回遊式大名庭園，庭園巧妙利用了「借景」手法，將遠處的天守閣納入景觀中。
彦根城嘅入場券係包埋玄宮園嘅，不過就要行一段路先去到~
正式入玄宮園之前，有個楽々園可供參觀~
玄宮園隨影~
遊覽完彦根城同玄宮園，仲有個彦根城博物館，呢個就要額外收費~
其實興趣就唔大嘅，不過一場嚟到，就睇埋啦~
彦根城博物館隨影~
之後就行去食午餐~
比内地鶏ほっこりや夢京橋店
據說呢度使用嘅比内地鶏係有証書嘅，好似好勁咁~
比内地鶏親子丼 x 2
雞肉係比較結實，唔滑，甚至感覺有少少鞋，可能雞肉比較結實嘅關係，但結實嘅口感係幾特別~
啲滑蛋真係不得了，蛋香非常濃，蛋液非常滑，我自己覺得主角係啲滑蛋~
時間方面比預期遲，如果唔 cut 景點，就冇得食下午茶~
大家都覺得冇所謂，反正過去一星期真係食得太多嘢~
八幡山展望館
展望館位於八幡山上，這裡曾是豐臣秀次修築的「八幡山城」，但城堡已毀。山上的瑞龍寺目前就坐落在八幡山城的山頂。在山上可以遠眺琵琶湖，以及被稱為「水鄉」的近江八幡市街景。
上展望館可以搭纜車，排隊買飛等咗幾分鐘先發現排錯隊......
佢嗰度係一間商店，纜車售票處都喺入面，但我哋排咗商店俾錢嗰條隊，而買飛嗰條隊係一直都冇人~
當屎塔影售票處上方嘅纜車票價同營運時間時，我先發現嗰邊先係售票處，而屎塔影完都冇發現......
我哋搭 15:45 上，回程尾班車 17:00，我覺得夠有凸，因為我知上面範圍唔大~
沿途風景都 OK~
上面行一圈只需 30 分鐘，個觀景台都算唔錯嘅~
行完一圈，見到仲有幾分鐘就有車，就行快少少~
最後趕得切搭 16:30 班車落山~
La Collina
位於滋賀縣近江八幡市的 La Collina，是當地超人氣的甜點主題樂園，結合了自然生態、建築藝術與美味甜點，可以即場看到製作過程，還有咖啡店可以慢慢享受人氣甜點年輪蛋糕同風景。
本來計劃係嚟呢度嘅 Cafe 食出爐年輪蛋糕嘅，不過佢間 Cafe 收 17:00，我哋嚟到時啱啱好係 17:00~
當然，完咗午餐嘅時候已經知道今日唔會食到，就算嚟到佢未收都好，都應該唔會食喇，否則今晚食晚餐會冇胃口~
不過園區就收 18:00，都可以嚟行吓~
停車場好大，但都接近爆滿，真係好有人氣~
車場都咁爆，入面當然唔會少人~
呢度食品種類非常多，主要係甜點，佢仲好巧妙咁喺成個園區入面設立咗唔同商店，每間商店都有同其他商店一樣同唔一樣嘅嘢，令到遊人會想行晒咁多間商店去睇吓仲有咩唔同產品~
La Collina 隨影~
之後就去食晚餐~
我事前有睇到有個停車場比較近餐廳，不過個車場比較細，有啲擔心冇位，到時又要周圍兜~
所以我喺經過一個大停車場時，索性泊入去，再行過去~
喺行去餐廳時，見到豐田租車分店，諗吓不如叫佢搞搞個車匙，不過唔知佢肯唔肯，始終唔關佢哋事~
唔理喇，問吓囉，唔得咪算~
行到過去，有一個人喺室外做緊嘢，於是就走埋去問佢~
可惜大家唔係幾溝通到，所以我就俾咗張車入面顯示車匙冇電嗰張相佢睇~
跟住佢講咗一輪嘢，但我聽唔明，佢就入咗去舖頭，等咗幾分鐘佢出返嚟，叫我哋入去~
原來佢聯絡咗租車俾我哋間分店，嗰邊會有人打俾我~
等咗一陣手機就響，對方叫我去便利店買電池自己換，還車時俾返張單就可以退返錢~
咁即係同冇嚟過冇分別，反正我幾有信心還車前都唔會真係冇晒電嘅~
嬉酔 くわ乃
まぐろ中トロ(吞拿魚中腹)
冇佢講嘅入口即化，後半開始有鮮甜味，真係好食~
睇佢啲紋理，藝術品咁，好靚~
甘鯛の松笠焼き(甘鯛松笠燒)
本來係叫金目鯛塩焼き(鹽烤金目鯛)，不過佢話冇，推介咗甘鯛の松笠焼き(甘鯛松笠燒)俾我哋~
一上檯好有驚喜，啲魚鱗烤到掦起，好明顯係魚鱗都食得，正！
魚肉閃閃發光，好有肉汁，好有魚味~
我係事後先知呢啲叫立鱗燒，又或者係佢菜單上寫嘅松笠燒~
其實立鱗燒同松笠燒係咪同一樣嘢呢？AI 話係，但 AI 有時都錯得好有自信嘅，不能盡信~
多得姐姐推介，令到我哋食到條咁好食嘅魚，又認識多一樣嘢~
帆立バター焼き(牛油燒帆立貝)
帶子充滿牛油香味，又燒到啱啱好，相當唔錯~
しらすと大葉の卵かけご飯(魩仔魚紫蘇葉生雞蛋拌飯)
魚仔本身冇乜味，但軟稔嘅口感加生蛋同飯，呢個配搭又幾好食~
紫蘇葉配生雞蛋又幾夾，有種清爽感~
たこの天ぷら(章魚天婦羅)竹竹大大大
好彈牙但唔係韌，炸得啱啱好，不過就冇一種好食嘅感覺，呢個好似比較普通啲~
近江牛赤身 炭火焼き(近江牛赤身 炭火燒)
口感軟稔，但其實我唔識欣賞，好似有點太生~
個醬酸酸甜甜，我個人就唔多鍾意~
唔點醬則食到鮮甜味，又幾好~
不過就比較細舊，我上網查過其他人啲相，好似冇咁細舊~
季節の茶碗蒸し(時令茶碗蒸)
蛋味香濃，入面有少少鰻魚肉，唔錯~
埋單時，我話俾卡，佢拎咗部卡機出嚟，但用 contactless 點都過唔到數~
咁我話俾現金，但佢可能覺得如果我本身想俾卡，佢都想照我意思去做，所以佢想繼續試~
佢想用實體卡試，但我冇實體卡，屎塔有，就用屎塔張卡試~
佢拎咗屎塔張卡之後，嘗試插張卡喺機頂，但其實個卡入口喺機底~
佢再試插入機底，但晶卡嗰邊向外，當然都係冇用~
呢兩樣嘢都係我提佢，我諗佢嗰吓應該好緊張~
最後用實體卡成功過數~
揸車去旅館途中喺便利店買埋宵夜~
沒有留言:
發佈留言