《瞬間看地球》Stranger's Blog: 2026.02.15 大阪府(河内長野、泉佐野) (日本第十二天)

今日行程：
【河内長野】関西サイクルスポーツセンター(包括午餐) → 【泉佐野】トヨタレンタカーりんくうタウン駅前店(還車) → 臨空城 Outlets → 大起水産回転寿司りんくうシークル店(晚餐)《住宿：オディシススイーツ大阪エアポートホテル》

早餐旅館包埋，係 Route-Inn，好啱食嘅早餐~
值得一提係佢個豆腐，唔係好滑，但相當有豆味，好食~

今日首先會去一個諗都冇諗過會去嘅地方，就係單車公園~
呢個單車公園有別於傳統觀念上嘅單車公園，佢係一個遊樂場~
多數活動都以單車為主題，一個結合單車同機動遊戲嘅遊樂場~
初時見到，問吓屎塔有冇興趣，我真係冇諗過佢一口就話要去~
佢好少踩單車，又唔好運動，點會對呢個有興趣？

関西サイクルスポーツセンター(關西單車體育中心)
一個以「單車」為主題的特色遊樂園，這裡不只是單純騎車的地方，更將運動與娛樂結合，非常適合親子旅遊或單車愛好者。

喺停車場已經見到好多一家大細嘅組合，今日應該會好嘈吓~🙈
不過以今日星期日嚟講，人流又比想像中少~

第一樣玩嘅係滑車~
呢樣嘢我一直都想玩，不過一直都冇咩機會，雖然呢個係迷李版，但未試過的話都 OK~
控制比想像中難，個個都好似玩得好過我咁......
第一樣玩嘅嘢就同單車冇關~

跟住就玩過山車~
一開始要齊齊踩去推動，初時都有啲擔心會唔會要一直踩到尾，但原來只係開頭一少段，之後會一直衝，唔駛踩的~
到最後返站頭嘅最尾段係大上斜，大家都拼命踩，但係，咪住先，咁嘅斜度，靠人力基本上係唔可以做到~
我懷疑係機械式拉我哋上斜，於是我同屎塔就停咗踩，但部車冇慢到，咁我哋就一直都冇踩，直至返到站頭~
即係成段只係開頭要踩吓，之後都唔駛踩~

跟住就玩呢啲類似家庭單車嘅有軌單車，呢個就全程都要踩......
同埋轉左彎時，部車會向右傾側(反之亦然)，第一吓真係有少少嚇親~

之後就同小朋友爭嘢玩，理論上呢個項目對大人嚟講係冇乜樂趣可言，或者我哋其實都想懷緬過去，拾回童真~
除咗最尾上斜，都係要全程踩~

呢個直上直落概念一流，玩味都唔錯，二人一籠，四個人可以左右兩籠，鬥快升天~
上到最高，會有一吓自由落體，之後落得快定慢就睇你踩得快定慢~
每次有兩個回合的，上落，再上落~

之後就去玩個同單車完全冇關嘅遊戲，立體迷宮~

喺同一個迷宮入面有兩條路線，兩條路線都唔單止係搵出口咁簡單，仲要喺過程當中集齊三個印先算完整過關~
喺兩條路線收集到總共六個印，喺出口就可以扱個金色印~

呢個我幾鍾意，但其實唔係幾適合我呢啲老骨頭~
過程要烏低身穿過唔夠一米低嘅圍欄、擒高攀爬、過獨木橋、過密集繩陣但難以保持平衡~
我唔知道有冇人喺度發生過意外，我只係知道整體嚟講，係潛在高風險嘅活動~
除咗體力，當然唔少得少少智慧嘅輔助~

行行吓唔見咗屎塔，喺迷宮入面，就算二人只係一欄之隔，都唔代表可以輕易匯合，更何況影都冇~
喺過程入面，我搵到四個印，原來有一個係錯嘅......
入場時佢會派張紙俾你，上面有晒所需資訊，亦有個印嘅樣喺度，搵啱印就可以扱上去個圖案度~
第一個搵到嘅印係藍色，第二個搵到嘅印係紅色，第三個搵到嘅印係藍色~
嚟到呢度我已經覺得有啲怪，點解會唔同色嘅呢？直至我搵到第四個印~
第四個印係藍色，圖案同嗰個紅色印非常相似，但唔係一樣~

咁好好醜醜都叫做集齊晒三個啱嘅印，並順利到達出口~
有人只係搵到一個印，仲要係錯嘅紅色印，並不順利哋要依照中途放棄嘅指示直接中間爆出~

我哋只係玩咗一條路線就用咗 50 分鐘，其實有一半時間都係嘗試同屎塔匯合，不過最終失敗~
時間上唔容許玩第二條路線了~

跟住又係同小朋友爭嘢玩，玩揸小火車~
過程中有紅燈亦要停靠車站，好不無聊~
更無聊嘅係，其實啲紅燈同車站，你唔煞車佢都係會自己停的......
呢個項目徹頭徹尾係親子活動，就連以拾回童真作借口都覺得尷尬~

萬幸我哋冇玩呢個，否則玩完要即刻離場以免患上尷尬癌~

都玩咗唔少項目，做咗好多運動(相對日常生活嚟講，踩兩吓單車已經算做咗好多運動~)，係時候去補充體力~

場內食品選擇不多，求其點咗幾樣~

オムソバ(蛋包炒麵)
そばめし(炒麵飯)
黒毛和牛メンチカツ(黑毛和牛炸肉餅)
カレーチャーハン(咖哩炒飯)

食後感只可以話充饑還是 OK 的~

之後就再去食嘢，食 Crêpe~
排隊嘅人得幾個，但就等咗好耐先買到~
因為師傅慢工出細貨，造出相當唔錯嘅 Crêpe~

チョコバナナ生クリーム(巧克力香蕉鮮奶油)
抹茶生クリーム(抹茶鮮奶油)

食完嘢休息咗一陣就去玩多次滑車~
排隊時見到前面有個小朋友，我諗大約 11~12 歲，著住拖鞋，屎塔話佢成個文泰咁~
結果，阿文泰喺第二隻彎就炒咗車~
而我第二次玩就覺得上手咗好多，速度亦高過第一次~

再之後就去玩射波波~
每局有五個波，開局要踩單車去儲氣，之後就入波，對準角度，放手，彈出，睇吓中邊個洞就取得唔同分數~
我好勁(符碌)，有一球取得最高分，其餘四球就......
個角度好難控制，因為佢彈射出嚟嘅角度係乜*炮嘅~
(孤陋寡聞，原來廣東話個"咩"斜，正字係乜斜~)

屎塔以為每射完一球就要重新開局，所以每射完一球佢都要踩單車去儲集，玩五球玩咗勁耐~

最後玩多次過山車就離場~
總共玩咗五個鐘，其實仲有啲嘢未玩，不過玩咗五個鐘都夠皮~

過山車賽道~

滑車賽道~

仲有好多變種單車~

外圍就有條賽道俾人踩正常單車~

夏天仲有水上活動~

佢另外仲有一條單車徑，可以租單車，踩住單車穿過叢林，不過我哋就冇玩~

関西サイクルスポーツセンター隨影~

玩夠就去トヨタレンタカーりんくうタウン駅前店還車~
我先車屎塔去旅館 check-in，我自己再揸去入油後還車~
還車過程一切順利~
還好車就行去旅館同屎塔匯合~

呢頭旅館選擇唔多，都係睇邊間平就 book 邊間，但自從步入大堂起就有啲唔對勁~
個大堂比起我哋住開嘅都靚，上到間房所在嘅樓層，根本係一間高級酒店嚟~
入埋房更加不得了，房勁大，高層，景觀開揚，以我哋咁慳家嚟講，極少住咁好嘅旅館~
可能因為淡季啦，亦可能因為少咗中國人，所以 4⭐ 酒店嚟講，係超級平~

仲有仲有，呢間酒店有免費穿梭巴士去機場的，前台話好搶手，要 book 就趁早~
所以去下一個地點前，我哋落去 book 埋穿梭先出發~
聽朝唔駛自己搭鐵路去機場，意外驚喜~

趁今次嚟日本，想買對防水鞋，睇吓會唔會平過喺英國買，再加上我哋真係極少行街買嘢，所以今次安排咗行 Outlet~

りんくうプレミアム・アウトレット(臨空城 Outlets)

防水鞋呢，想買嗰隻牌子，喺呢度都係冇防水系列，唔通防水系列係歐洲限定？定係亞洲限定冇？
不過我哋喺 Columbia 睇到對好平嘅 boot 款，但其實我唔係好想著 boot~
但係 Columbia + Boot + 防水 + 平，真係忍唔到唔買~
平成點？7090 円免稅，即係大約 HK$350，係超平！
買多樣仲可以全單九折，不過實在冇嘢啱，所以只係買咗呢對鞋~
款就舊啲，冇所謂啦~
(後記：佢個防水技術叫 Outdry，水係防到，但就冇 Gore-Tex 咁透氣~)

除咗買鞋，仲要買啲手信~
呢度有ドン・キホーテ(驚安之殿堂)，所有手信都可以喺度買齊~

屎塔亦都喺 outlet 搞掂晒啲扭蛋，仲喺度買咗件衫俾佢媽咪，佢自己都買咗唔少嘢~

大家都買夠，時間又有啲晏，聽朝仲要一早起身搭飛機，所以唔打算去餐廳食飯，喺便利店買啲嘢返酒店食算~
行返酒店時經過寿司店，不如入去食埋先返酒店啦~

大起水産回転寿司りんくうシークル店