今日行程：
【大阪】トヨタレンタカーなんばターミナル店(租車) → 【淡路島】Hello Kitty Apple House / Show Box → Buns & Patty(午餐) → Hello Kitty Smile → 鮓 大磯(晚餐)《住宿：寿庵》
噚日食唔到木津市場個海鮮丼，有諗過今朝去食，不過要為咗食海鮮丼一大早起身，大家都覺得冇咁嘅需要~
咁食咩做早餐呢？就係唔食喇~
呢個星期都真係食得太多嘢，雖然唔係食滯，但實在唔算好有胃口~
(咁咪即係食滯囉，其實點定義？)
トヨタレンタカーなんばターミナル店
今日首先再去租車，就喺之前還車嗰間再租過，希望今次都俾返部 Roomy 我~
同我搞手續嗰位小姐，佢啲英文完全冇日本口音，佢個樣都完全唔似日本人，而佢嘅態度之差亦好唔日本，我幾乎可以肯定佢係嚟自中國或者台灣或者香港~
我喺豐田租過好幾次車，連同租車同還車，要數今次態度最差~
車就俾咗部 Yaris 我，雖然點都高級過部 Roomy，但我鍾意 Roomy 多啲......
跟住就出發去淡路島~
呢個季節去淡路島，幾乎係完全冇嘢睇，超級淡季，不過屎塔話想去 Hello Kitty Smile，咁當然冇問題啦~
中途屎塔話想飲咖啡，咁就留意吓邊度有休息站，最後入咗京橋 PA~
入到休息站，佢買咗杯咖啡，我買咗個包，呢度有軟雪糕賣，不過晨早流流唔食雪糕啦~
Hello Kitty Apple House / Show Box
Hello Kitty Apple House 獲得了「最大的蘋果造型建築」健力士世界紀錄。入面係一個 360 度圓頂劇場，可以睇到 Hello Kitty 主題嘅影像同故事；頂層設有觀景台，除了可以看到美麗的瀨戶內海海景，最特別的是可以俯瞰鄰近「Hello Kitty Show Box」建築屋頂上的巨型 Hello Kitty 頭像。
Hello Kitty Show Box 是一個將「美食」與「表演」結合的獨特主題餐廳，Hello Kitty 會親自參與音樂劇或樂隊表演。
去到停車場時，見到得幾架車，即時有啲怯，希望唔係摸門釘啦~
入場前周圍行吓先~
入場時想話買 Hello Kitty Apple House 同 Hello Kitty Smile 聯票，獲告知 Hello Kitty Smile 正在維護中，今天不開放，但仍然可以去商店~
呢一刻，我感覺到我生命即將走到盡頭~😥
唔怪得停車場咁少車啦，雖然 Hello Kitty Smile 係要再搭/揸車過去，唔喺呢度，但通常都係一拼遊覽，所以點解冇乜人選擇呢啲時間嚟~
我編行程時，一向好小心留意啲營業時間，邊日會休息咁，我幾相信我唔會睇錯~
可能因為我好早就開始編行程，我睇嗰時佢未有顯示維護資訊~
之後睇返佢維護時間為二月頭至三月中，即係我無論如何呢次旅程點都唔會去到，總算逃過死罪~💨
但如果早啲知，失望嘅心情相信會冇咁大，我亦都唔會計劃嚟淡路島，因為呢個時候嘅淡路島真係冇乜嘢睇~
又會情人節時段先嚟做維護嘅，但選擇淡季嚟做維護又冇錯嘅，但又會情人節時段先嚟做維護嘅......(不停 loop，總之係園方唔啱啦！)
咁冇計啦，都要面對現實，入 Apple House 囉，陣間都唔知做乜好，邊玩邊諗~
Hello Kitty Apple House 內部
Hello Kitty Apple House 頂層
跟住就行去 Hello Kitty Show Box
Show Box 主要係睇 show 食嘢，仲有商店~
我哋就唔打算睇 show，屎塔話 Hello Kitty 人咁高同埋有長腿，完全唔係嗰回事，係破壞系列~
咁就入去行吓商店~
喺商店度買咗少少嘢，made in Japan 咖，呢個時代好多都唔係~
Show Box 外睇到 Hello Kitty 喺個 show 入面嘅造形~
咁啱見到部 Hello Kitty 穿梭巴士~
行完呢度就揸車去食嘢~
食嘢嘅地方係一個個貨櫃嘅組合，入面有唔同餐廳，地理位置介乎 Hello Kitty Apple House 同 Hello Kitty Smile 之間~
泊車呢，理論上就免費，但點證明我哋係符合免費泊車呢？唔理住，陣間先算~
雖然我已經計劃好食邊間，但嚟到都由頭到尾行一次先，睇吓有冇其他嘢想食~
行到差唔到尾段，見到一間出售嘅食物同我計劃好嗰間好似一樣，記低個 menu 先，再行返轉頭同嗰間對比吓~
由頭行到尾，冷清得可怕，成個場唔計做嘢嘅人，肯定冇 20 人，係可能 10 個都冇~
主觀上，我哋確定冇其他餐廳啱食；客觀上，其實只有我哋計劃好嗰間餐廳有生意，當然會揀佢~
行返轉頭去計劃好嘅餐廳，菜單係一樣，餐廳名都係一樣，只係個外觀完全唔同~
街尾嗰間就冇客，街頭呢間有啲客，所以就呢間~
Buns & Patty
淡路島バーガー(ポテト付) x 2
淡路島漢堡(附薯條) x 2
個漢堡係幾正，洋蔥係淡路島名物，好甜，係好食，但唔係未食過咁好食嘅洋蔥~
個漢堡牛好好食，煎到勁香，非常有肉汁~
食完漢堡就去食雪糕~
行到埋去好似冇營業咁，望咗半分鐘，先見到入面有人玩緊手機~
不過我一啲都無怪佢嘅意思，鬼影都唔多隻，唔通仲同你企喺最前線等客嚟咩~
我哋都係買淡路島牛乳雪糕，一個杯裝，一個筒裝~
牛乳味超濃郁，正！
本來安排咗陣間去食 pancake，不過食完呢杯雪糕就知道，唔會咁快再有胃口食嘢，應該唔會去了~
對開就係瀨戶內海，環境係幾正，食完嘢就周圍行吓~
行到最尾，我哋由間商店度行出嚟，咩都冇諗，行到出嚟就企咗喺度，一秒後就有部穿梭巴士自對面線逆線駛過嚟，我哋好快意識到咩事，即刻耍手擰頭~
原來我哋一出商店向前行兩步就嚟到穿梭巴士站，咁啱有部巴士嚟到，佢以為我哋要搭，不過佢應該見到我哋啱啱由商店步出，唔會怪我哋嘅~
去停車場攞車時有啲猶豫，佢講明嚟食嘢買嘢免費泊車，講到咁樣又唔覺得要証明，我覺得根本就唔預有人俾錢~
都走去個精算機睇吓，佢又有晒好正式嘅收費程序，有我哋入場嘅影像，明明我哋就符合免費嘅資格，但就唔敢唔俾，500 円當買個安心~
Hello Kitty Smile
以「海中 Hello Kitty」為概念，打造好似龍宮城(海底世界)嘅沉浸式空間，可以見到穿住乙姬(龍宮公主)造型嘅 Kitty，結合主題餐廳，提供用淡路島新鮮食材製作嘅創意料理，一邊食一邊欣賞海景。
嚟到 Hello Kitty Smile 停車場，見到都幾多車，我覺得有啲奇怪，但絕冇抱任何希望，嗰邊都講明唔開放，網上亦清楚顯示維護中，絕對冇可能有奇蹟出現~
入咗場就知呢度仲有三個地方係開放嘅，餐廳、商店、workshop~
我哋唔係嚟食嘢，亦冇預約 workshop，所以就只係行咗商店，同戶外僅有開放嘅範圍~
我哋喺 Hello Kitty Smile 係超 hea 遊，但仍然仲有太多時間唔知做咩好，最後決定去旅館 check-in 先~
Google 帶我行埋啲荒山野嶺，條路又斜又窄，地下滿是樹葉，好似好耐冇車行過咁~
Check-in 時係一男一女，應該就係夫婦嚟，由女士講解間屋同附近環境，非常詳盡，好彩我哋有時間~
期間佢講咗兩個重點~
一係有個路口經常有警察捉停車位唔停嘅司機~
二係教我哋出入行邊條路比較好
呢度個環境唔錯，仲對住東邊，天氣夠好，起得夠早，就可以睇到日出~
不過嚟呢間旅館，唔揸車的話，都應該幾難先嚟到~
預約咗今晚 18:00 食飯，飯前仲有啲時間，去摩天輪的話，時間應該夠，仲可能撞啱黃昏，就去坐摩天輪啦~
睇完地圖，去摩天輪好似要經高速公路收費閘，如果係的話咪好戇居？去個摩天輪咋喎，要俾高速公路費？去到附近再算~
去到附近，我刻意唔去收費閘，等佢再俾條路我，因為摩天輪就喺我隔籬~
結果，過咗收費閘，要去距我 100 米都唔夠嘅摩天輪，揸車要 15 分鐘......
兜咗一陣，放棄了，真係要跟佢條路的話，會趕唔切去食飯，聽朝離開淡路島時先去~
而家決定去行大型超市，係旅館嗰位女士話我哋知邊度有大型超市嘅~
去超市途中，喺路邊見到個勁大嘅貓字，上網查吓咩嚟，原來係貓嘅畫展，不過冇時間去吖，會研究吓聽日去唔去到~
行咗陣超市，都幾多嘢賣，聽朝冇早餐(旅館早餐要加錢又唔啱食就冇加到)，食完飯再返嚟買宵夜同早餐~
鮓 大磯
選擇極少，亦冇價錢~
有冇價錢都唔係重點，因為預咗唔會平，有心理準備~
但選擇少得嚟係唔識叫，翻譯咗都唔能夠完全理解~
最後點咗廚師發辦嘅刺身同寿司拼盤~
Coke and Ginger ale
所有刺身同寿司嘅肉都係喺呢度拎出嚟~
厚切刺身，爽口且鮮甜無比~
白肉紅肉貝肉通通令人食出幸福感~
拖羅唔算入口即化，但鮮味十足~
不過屎塔唔鍾意厚切，我就鍾意厚切多過薄切~
寿司飯冇乜醋味，反而冇覺得好好味，但明明係同一堆材料~
當中有個烤蝦頭，相當脆口~
最後叫咗兩碗茶碗蒸，入面好多料，好好食~
喺屎塔去咗洗手間時，個廚師問我係咪香港嚟嘅，我好意外~
我做過啲咩嚟令人覺得我係香港人？定還是最近因為一條片而多咗香港人嚟？
不過大家唔係好溝通到，所以我都冇問太多~
埋單預咗好貴，又冇喎，11700 円，一啲都唔貴~
去超市買宵夜同早餐，好多嘢望落都好食，全部都想買~
旅館之前有教行邊條路返去好啲，我哋盡量跟，因為天已全黑，我唔係好想行埋啲隨時跌落山嘅路~
跟佢咁行的確係好行好多，但 google 一定唔會帶行呢條好行嘅路，因為真係會遠咗~
沒有留言:
發佈留言