《瞬間看地球》Stranger's Blog: 2026.02.14 兵庫県(淡路島)、大阪府(箕面、大阪、高石) (日本第十一天)

今日行程：
【淡路島】大観覧車淡路 SA → 【箕面】鱻〜ぎょぎょぎょ〜(午餐) → 箕面瀑布 → 勝尾寺 → 【大阪】海遊館 → 【高石】サイゼリヤ高石羽衣店(晚餐)《住宿：ホテルルートイン高石羽衣駅前》

今日 check-out 時，對方好熱情咁話幫我哋影相，其實佢啲影相位都似係想我哋幫佢推銷間屋，咁又無可厚非嘅~

噚日見到嗰個貓嘅畫展係水墨畫嚟，去的話時間比較難控制，亦唔算係真係好有興趣，所以就唔去喇~

大観覧車淡路 SA
去摩天輪，點都要經過收費閘口先去到，所以就趁今朝要離開淡路島嘅時候順便去~

淡路 SA 個停車場好大，但都滿咗九成，個個都嚟玩摩天輪？咁咪要排幾粒鐘？
睇真啲，又唔係喎，摩天輪係接近冇人坐咁滯喎，咁咁多人嚟呢度做乜嘅呢？

留意到附近有個地方有比較多人流動，就行過去睇吓~
嘩嘩嘩！原來呢度個景係好正！我一啲都唔知，都唔知點做功課！如果唔係摩天輪我就唔會嚟~
嗰種開揚廣闊感好強，因為完全唔喺期望之中，第一眼見到個感覺係震撼，好壯觀！
BTW，呢條叫「明石海峽大橋」

講緊佢呀~

跟住就去坐摩天輪，唔駛排隊，因為冇人坐~
其實個景都幾好吖，800 円一個又唔係貴，唔明點解冇人坐~
坐一圈大約 15 分鐘，好少坐摩天輪覺得值得坐，呢個值呀~

坐完摩天輪，就好不捨咁返上車，準備去勝尾寺~
當準備去勝尾寺，睇到自己記低嘅備註，醒起個停車場週末係要 book 嘅，今日係星期六，再諗吓我有冇 book呢？係冇嘅！
即刻上官網睇吓仲有冇位，最快 15:00 先有位，失晒預算~
咁晏先去勝尾寺，之後就可能去唔到計劃好會去嘅海遊館~
嗱嗱臨睇吓海遊館閂幾點，原來閂 20:00，咁都勉強可以~
即刻 book 勝尾寺停車場先，不過好麻煩，要入片假名，搞咗好耐，試咗唔同網頁轉換先試到一個，個系統接受嘅~

15:00 先去勝尾寺，咁去勝尾寺前就要搵地方去~
好多人去勝尾寺會連埋箕面瀑布同箕面昆蟲館一齊去，但聽人講話呢個時候去箕面瀑布冇咩睇，水量少~
唔理住，去到箕面食埋嘢先算~

打開 google，輸入目的地，路程要兩個鐘，但車嘅導航，幾條路線入面，一條係一個鐘，其餘都係兩個鐘~
爭咁遠，唔知信邊個好~
由於我唔係好信個車導航(至於咩原因，我唔記得咗，但一定係有啲原因嘅)，打算跟 google~
屎塔都覺得奇怪，所以佢又試吓 google，點知佢個 google 顯示一個鐘，咁跟佢個導航囉~
有時做人都真係好X冤枉~

而家先見到，估計係進出呢個服務站係免費~

鱻〜ぎょぎょぎょ〜

黒ソイ煮付定食(燉黑鱸魚定食)
刺身小鉢付き(附刺身、小菜)
魚肉幾滑，但唔算好有魚味~
刺身都唔錯~

金目鯛定食(金目鯛定食)
刺身小鉢付き(附刺身、小菜)
魚肉都好滑，好有魚味，真係唔同層次~
刺身鮮甜，幾好~

食完嘢就繼續去玩~
我哋決定只去瀑布，唔去昆蟲館~
講真就兩個都唔算大興趣，但都要搵啲嘢攝吓時間~

箕面瀑布
箕面瀑布是日本百選瀑布之一，瀑布落差高達 33 公尺，水流從懸崖峭壁傾瀉而下，配合周圍的巨石與森林，四季皆有不同的美感。

由停車場行落去瀑布要行成一公里，來回就兩公里，比我預計嘅仲要遠~
好彩時間鬆動，否則會騎虎難下，一場嚟到又冇理由唔落去，但如時間緊迫又唔知點好~

呢度唔知發生過咩事，火燭？

如果水量夠多，係幾壯觀嘅~

天氣好時去睇瀑布，好多時都會附送彩虹~

有手機 app 嘅輔助，手持都可以用到長曝光又唔算太朦~

時間差唔多就去勝尾寺~

勝尾寺
這座寺廟以「祈求勝運」聞名，最震撼視覺的就是隨處可見、成千上萬尊的紅色不倒翁~達摩。寺內到處都是信眾還願留下的達摩不倒翁，石燈籠的縫隙、階梯旁、甚至是樹枝上都坐滿了紅色小身影，非常有療癒感。

14:50 到達停車場口，但不開放進入，工作人員一直示意繼續走~
由於我喺大路，實在唔停得，既然佢問都唔問就要人走，咁應該都係無論如何都唔入得住~
個問題係，呢頭係山路，一路向前走都唔覺有路掉頭，只能向前走~
直至行到 1.6 公里後先有位掉頭，仲要走返 1.6 公里返去~
但今次入口變咗喺左手邊，唔再係對面線，我點都會停一停問吓佢~
返到去唔需要問了，已經開放進入，不過入到去要排隊~

我排第三，工作人員同前兩部車溝通咗好耐，來來回回，終於走埋嚟我度~
我顯示俾佢睇我嘅預約訊息，佢即刻容許我繞過前面兩部車直入停車場~
唔知嗰兩部車咩事呢？

關於勝尾寺，我係睇到一單新聞先知有呢個地方，呢單新聞係關於一個台灣相關嘅擺設被人破壞，破壞佢嘅人，係咩國家就唔駛多講喇~
本來想嚟睇吓個台灣擺設嘅，但嚟到就沉醉咗喺呢度個環境，頭大半時間都唔記得，到我記得時，喺餘下時間都見唔到個擺設，唔通個擺設冇咗？

呢度有樣好好嘅活動，就係蓋印式製作明信片~
喺呢度，一開始會有將空白明信片俾你，順住行，會經過總共六個蓋印點，只要集齊六個印，就可以製作到一張完整圖案嘅明信片，小小設計，帶來不錯嘅樂趣~

我每次蓋印都會盡量對齊，大力一吓壓落去，所以啲圖案對得幾齊，啲顏色幾實，幾靚~
最後成品，屎塔嗰張靚過我，因為我太大力壓落去，最初係靚係實色，但之後過多嘅墨水就會化開，咁就冇咁靚~
(上面係屎塔嘅；下面係我嘅)

勝尾寺人氣相當高，但人潮並不多，可能因為我哋比較晏嚟~
園區冇想像中大，好快行完~
周圍都係達摩，係幾正~

勝尾寺隨影~

行夠就去海遊館，時間上都還可以，不過中途遇上塞車，順其自然啦~

海遊館
海遊館是全球規模最大的水族館之一，以其獨特的建築設計和巨大的蓄水量聞名，館內最受矚目的核心是深達 9 公尺、蓄水量達 5,400 噸的「太平洋」水槽，這裡居住著海遊館的明星 - 鯨鯊，看著這頭巨大的海洋溫柔巨人緩緩游過，視覺效果非常震撼。

到咗海遊館......對面，不過有雪糕筒欄住唔俾右轉入停車場，唯有靠屎塔睇住地圖睇吓點樣兜去對面線~

個館都幾大，我哋有唔夠兩個鐘嘅時間，應該會有啲趕~

成個館個設計係圍繞住個大缸行，真係去到邊都見到條鯨鯊~
對我嚟講係有少少分神，因為去到邊都想望吓條鯨鯊嘅蹤影，個注意力係少咗喺其他物種身上~

行完其實有少少負面感受~
個水缸真係超巨型......對人類嚟講；對條鯨鯊嚟，游兩吓已經要轉身，仲要個缸入面有兩條，我覺得全時間咁困喺度係好精神折磨~
咁當然，我嘅感受又唔等於佢嘅感受啦~
另外，館內有隻南美小浣熊(South American Coati)，喺度不停繞圈行，根據動物心理嘅解說，咁係有可能精神上受到好大壓力，長期被困可以係原因之一~

我哋已經盡量唔會去一啲要動物表演嘅動物園或者水簇館，或者連為牟利而圈養動物嘅地方都應該少啲去~

海遊館隨影~

跟住就去旅館 check-in 再行去食飯~
喺駛向旅館途中，俾部警車截停！
不過大家雞同鴨講，我都唔知點解佢截停我，佢仲問我攞駕駛執照，咁我就俾咗本國際車牌佢，佢返咗警車一陣，返嚟俾返本國際車牌我就冇理我，佢自己開車走咗~
咁我見佢走，我就當冇事發生繼續開車，我估佢知我係遊客搞我都費事~
咁好正常地就會諗吓自己衰咩，回想吓俾人截停前我做過啲咩~
首先我一定冇超速，第二我冇扒人頭，冇轉線，唔構成影響他人，我諗到第三樣，我真係有機會衰咗，就係衝燈~
俾人截停前，真係有一個位我係有啲疑惑，當時我專注於路面情況，有可能衝咗燈自己唔知~
今晚返去睇車 cam 睇吓有冇罪證先~

去到旅館，車位爆滿，停車場大叔指咗我哋去隔籬公眾停車場，收費仲平過旅館收嘅~
不過啲規則有啲複雜，現今世代，有 AI 幫忙，好易搞~
我影張相俾 AI，叫佢解釋俾我聽，有唔明再問吓佢，清楚明白晒~

泊好車，唔 check-in 住，去食嘢先~
(我諗個大叔一定覺得好奇怪，就隔籬街，泊車泊咁耐都未返嘅？)

計劃中係去一間高分日式家庭料理店 - せかんどはうす，不過今日有人包場，摸門釘了~
咁就打開 google map 搵吓有咩選擇~
細城市加有啲夜，冇乜嘢食，最後搵到間食日式丼同意式嘢，兩間喺同一位置~
今日係情人節，就帶屎塔去食意大利菜~

サイゼリヤ高石羽衣店
(即係 Saizeriya😝)

店入面勁多人，等位都冇咁滯，睇嚟大家都趁情人節同另一半嚟食意大利菜~
隔籬日式丼相當低分，唔係好想過去食，同埋我哋都好多年冇食過 Saizeriya，更加未試過亦相信將來極少機會會選擇喺日本食 Saizeriya，所以就選擇等吓~

セットドリンクバー(暢飲吧套餐)
如果唔係焗叫飲品呢，我多數情況下只係飲水，所以今次只有屎塔叫飲品~

たまねぎのズッパ(洋蔥麵包湯)
味道 OK，只係有點太鹹~