今日行程：
【大阪】トヨタレンタカーなんばターミナル店(還車) → 焼肉 㐂舌 法善寺(午餐) → グルニエ(Grenier) → Tomica/Nintendo/Capcom/One Piece → 大阪堂島浜タワー → 淀屋橋スカイテラス → ゑび真 EBI SIN(晚餐)《住宿：アパホテル＆リゾート〈大阪なんば駅前タワー〉》
朝早起身之後，有啲懶，所以決定唔去計劃好會去嘅 teamLab Biovortex Kyoto，反正又唔係真係好想去嘅地方，費事趕~
早餐旅館包埋，係日式早餐，仲可以自己包手卷，不過我自己就唔太鍾意自己包，not for me~
嘢食係 OK 嘅，但明顯胃口冇之前咁好，可能真係有啲食滯咗~
今日屎塔個朋友會嚟到京都，佢陣間就去接佢，之後我同屎塔就會分開，佢同佢朋友玩，我就自己一個獨遊~
佢朋友後日下午就會搭飛機返香港，之後我同屎塔又會一齊返~
食完早餐就返上房 hea 到差唔多 11:00 等最遲可以 check-out 嘅時間，因為佢朋友仲未到~
Check-out 後，屎塔就會去京都站接佢朋友，我就自己揸車返大阪還車~
噚日朝開始有入油嘅念頭，就開始留意油站，由我開始留意油站開始，一間都冇遇到~
想入油之前，日日都經過四五間油站，有念頭去入油時就一間都冇，好似京都係冇油站咁~
如果一切順利的話，油量其實夠我返大阪，咁當然冇需要冒險，反正還車時都要入滿油先還~
上高速前要入好油，所以而家要主動搵油站，唔可以再等經過先入~
返到大阪落高速已經到還車點咁滯，但還車前要入返滿油先，又要兜遠啲去入油~
還車過程一切順利，佢哋仲有問我有冇換到電，想話俾返錢我~
還完車行去旅館好近，但未夠鐘 check-in，要寄存行李先~
喺度寄存行李，係要 scan 佢個 QR code 登記，登記好就有人幫忙寄存~
搞掂就可以輕裝開始我第一次嘅獨遊，先去食嘢~
途經道頓堀，都幾多人~
焼肉 㐂舌 法善寺
到咗門口，想入去之際，醒起要影相先，因為食完實唔記得，就係咁，影一張相，就浪費咗 15 分鐘~
事情係，喺我影相之際，有兩個女仔嚟到，入咗去，之後我就跟住入~
嗰兩個女仔有位，直入，我就要等~
店員帶完嗰兩個女仔上樓，就同我講要等 15 分鐘，同埋要而家 order 埋食咩先~
感覺上佢話俾我聽等 15 分鐘，其實係想我唔好等，可能因為我一個人啦，咁但係我都要食嘢嘅~
呢一刻係得我一個人喺度等位，等咗 10 分鐘到先再有兩個人入嚟~
真係等咗差唔多 15 分鐘，有人離開，跟住就帶我上樓~
我一個人嚟，佢都俾一間房我，咁我明喇~
每一個 party 都俾一間房，一個人嚟食，的確係唔算受歡迎嘅，咁佢想我放棄都好正常~
不過或者人哋都冇咁諗，可能係我感覺錯啫，總之快手快腳食完就走~
之前落 order 時，好掙扎叫燒牛舌定燒牛肉好~
不過我未試過喺日本食牛舌，所以決定試吓佢~
熟成タンのお重 - 並
*「並」即係普通份量
個飯面堆滿生蔥同埋蒜頭，幾辛口吓~
由於生蔥同埋蒜頭係幾重味嘅嘢，所以我食唔到牛舌有啲咩味~
但係個口感就出晒事，非常韌！係每一舊都咁韌，沒有例外~
每一嚿都係咬到咬唔開嘅時候要夾硬吞，定其實係要好似食蔗咁樣淨係食佢啲汁，唔食佢啲肉？
我唔明點解會有人推介，定還是佢哋食嘅同我食嘅係唔一樣？
係咪懲罰我一個人霸一間房？
還好有一樣牛肉係咬得開嘅，就係個漬物，係牛腩嚟嘅~
隔籬房係香港人，講嘢非常之大聲......
食完飯就開始行去梅田，由呢度行去梅田，要一小時，搭車當然會快好多，但我唔需要快，喺大阪其實我冇咩地方想去，所以比較想行吓~
選擇去梅田，係為咗一個連我自己都覺得不可思議嘅理由，陣間再講~
經過固力菓打卡位，本來冇諗住影相，又唔係未嚟過，亦唔知點解咁受歡迎~
不過好似有種唔影會犯法嘅感覺，好啦，求其影張啦~
喺行去梅田呢一程路，我有三個食嘢點可以去：
MooKEN - 人氣泡芙
Melt Chocolate - 濃郁熱朱古力
Grenier - Crème brûlée 千層酥
唔係要去晒，只打算去一個啫，睇吓去到邊個就邊個~
MooKEN，99% 食唔到，因為佢長期人龍，並且賣晒就收檔~
以我呢啲時間去，多數賣晒收檔，就算未，要排長龍我都唔會排~
去到結果係收咗檔~
Melt Chocolate，冇聽過要排長龍，不過我去到嘅時候冇位，入面個個都好似有排都未會走咁，唔等啦~
Grenier，佢喺梅田某角落，梅田係一個幾複雜嘅地方，唔熟梅田嘅人，係會有啲難搵，我都真係搵咗幾耐吓先搵到~
據講經常有人龍，如果去到長龍，我都唔會排，由佢~
去到門口有四五個人，好奇怪，條龍唔係由舖入面打直排到出面，係只係喺門口打橫排咗幾個人~
望真啲，原來個個手上面都有嘢食，只係佢哋打橫企晒喺門口度食，見我喺度望吓望吓佢哋先識行開~
佢哋讓開咗，我先睇到舖入面係冇人龍，咁我終於買到嘢食~
俾完錢係要攞號碼等，證明佢一般都係要等，不過只係等咗幾分鐘就有~
當我攞完食物出門口嘅時候，又有另外幾個人企咗喺門口食嘢，點解啲人咁鍾意喺人哋舖頭門口，封晒出入口喺度食嘢？係咪痴X線？
出面有好大個空間好多位可以坐低食都唔鍾意，係要封咗人哋個出入口，吓吓有人出入就要讓，好X好玩？
(啲人堆晒喺門口嗰時冇影到相，我都係食完先記得影~)
Crème brûlée 千層酥
酥皮由頭食到尾都咁脆，吉士醬唔太甜，非常之好味，終於食到啲有人推介又唔伏嘅嘢~
都唔係完全唔伏，因為佢唔熱，係一啲都唔熱，暖我都收貨，但佢係冇溫度~
呢度好多白鴿，因為地下大把嘢食~🙈
之前講過，去梅田係為咗一個連我自己都覺得不可思議嘅理由，事情係咁嘅......
由於我喺大阪搵唔到有咩好做，諗吓不如搵啲模型車睇吓，問吓 AI 邊度有得睇，其中一個佢推介俾我嘅係 Tomica~
其實呢，我唔係想睇 Tomica 呢啲模型車仔，係想睇嗰啲高質精細嘅 1:18 或者 1:24 模型車~
我明知 Tomica 唔係我想要嘅嘢，但我仍然安排行一個鐘過嚟，有時我都唔知自己諗咩，所以我覺得係有啲不可思議~
梅田區真係好複雜，搵咗好耐先搵到~
Tomica
同一層仲有其他舖頭，興趣唔係冇，🤏 咁啦~
Nintendo
Capcom
One Piece 冇影到相~
我安排咗兩個觀景台黃昏嘅時候去，而家時間有點早，唔緊要，照去咗先，希望嗰度有櫈坐吓~
大阪堂島浜タワー
觀景台位於 16 樓，免費開放，呢個觀景台望出去嘅景幾靚，我自己幾鍾意~
呢度有幾張櫈，人又唔多，我由天光坐到黃昏，再坐到天黑，成段時間，冇一刻係多過十個人~
呢度冇嘢可以固定手機，主要都係手持，再貼玻璃影，但玻璃唔係完全垂直，要影縮時攝影有啲難度，我都試咗好多次先有一次比較清晰比較滿意~
之後就行去第二個觀景台~
淀屋橋スカイテラス
觀景台位於 30 樓，免費開放，呢個都唔錯，同埋幾多人，多數都係一雙一對~
呢度個氣氛係好過之前嗰個，但景呢，我就鍾意之前嗰個多啲，同埋呢度個玻璃比較污糟~
又試吓縮時攝影~
係時候去食晚餐~
我仍然選擇行返落去道頓堀，不過今日誤判咗天氣，放低咗件大褸著咗件薄褸，結果其實全日都好凍，而家夜晚其實仲凍~
我呢一刻可以因為凍而選擇搭車，但係我選擇繼續行落去~
ゑび真 EBI SIN
呢度完全冇客，場面好冷清，但係服務唔錯~
由於完全冇客，我都驚奶奶哋嘢，通常去人哋推介嗰啲餐廳都係西多過 like~
濃厚オマール海老つけ麺(濃厚龍蝦沾麵)
オールトッピング(全配料)
辣度佢有 0, 0.5, 1, 2, 3, 4 揀，我揀咗 0.5~
根據網上推介係蝦湯沾麵，但原來係龍蝦湯沾麵~
個龍蝦湯非常之濃郁，沾麵口感好特別，硬硬地唔算彈牙，但又幾好味~
好多配料，又有生洋蔥，繼續辛口~
個雞火腿又幾得意，食落係火腿嘅質感，但味道係雞嚟，應該係第一次食~
樣樣嘢都唔錯，唯獨個叉燒又乾又嚡~
食完嘢就行返旅館，開始落雨，算係十分幸運，完晒行程先落雨~
Check-in 過程全自助，可以用卡，但冇得用 contactless，只好用現金~
本來諗住今晚夜少少先落去買宵夜，不過撻落床之後好快就瞓着咗，醒返嘅時候已經有啲夜，仲有好多嘢未搞，所以就冇落去買宵夜~
同埋有少少頭痛，希望瞓一覺冇事~
喺屎塔啲相度搵啲嚟 post 記錄一吓~
金沢まいもん寿司 京都駅ポルタ店
ちいかわもぐもぐ本舗 伏見店
伏見稲荷大社
辻利 京都タワーサンド店
瓢斗 (ひょうと) 京都駅前本店
京都隨影~
沒有留言:
發佈留言