今日早機離開日本返香港轉機返英國了~
出發前喺便利店求其買咗啲嘢食~
之後就搭穿梭巴士去機場~
返香港班機，好多都唔係香港人，可能好多人喺香港轉機~
個空姐埋嚟問我哋想食嘢，佢哄到好埋，又好詳細咁講有咩食~
問完我哋，再問對面座位個女仔，呢位空姐直情跪喺度問~
我哋喺香港嘅轉機時間大約有 9 個鐘~
到港入埋境預一個鐘，check-in 離港預最少兩個鐘~
即係我哋有 6 個鐘空閒時間~
留喺機場又太閒，出市區又太趕~
最後好易做決定，比較想休息吓，就留喺機場 hea~
因為太多空閒時間，屎塔仲約咗佢媽咪喺機場食晚飯，珊飛話太遠，不來了~
由於有成 6 個鐘空閒時間，初時冇諗過有咩做，只係想搞掂啲行李，於是我哋就去詢問處問吓邊度可以有 locker 寄存行李~
個服務員塊面西到爭佢錢冇還咁款，係咪要講英文或者普通話先會好啲？
服務員話冇 locker，但有寄存行李服務，指咗個方向俾我哋~
我哋去到睇睇價錢，有點貴，作罷，反正其實我哋好大機會唔會周圍走，其實唔寄都冇所謂~
之後屎塔話想食嘢，最後食咗碗燒鴨瀨~
我冇乜胃口，所以冇食到嘢~
之後搵到個冇乜人嘅位，一坐就係幾個鐘~
坐到屎塔媽咪嚟到機場先動身去匯合佢~
屎塔揀咗去阿鴻小吃食晚餐~
(冇影到門口相......)
叫咗兩杯豆漿，一凍一熱~
好香濃嘅豆味，可惜甜咗啲~
另外叫咗兩碗飯~
陳醋豬手
醋味唔算突出，微酸中帶點甜味，最後先食到鹹味~
豬手好有膠質感，帶點煙韌但唔係難咬~
呢碟豬手，個個讚好~
籠仔欖菜肉鬆蒸陳村粉
啲粉幾滑，但又唔會一夾就散~
縱使有欖菜有肉鬆有醬油，都覺得只係配角，啲粉先係主角~
經典菜遠炒牛肉
牛肉幾滑，又唔係腍得嚟冇咬口~
菜夠翠綠又冇渣~
清心綠豆爽
呢個係該店推薦嘅，係幾有清爽嘅感覺，但又冇覺得好好味~
福果薏米蛋白腐竹糖水
相當清甜，各種食材嘅味道加埋真係啱啱好~
大家都覺得呢碗好食過清心綠豆爽~
機場+中餐+米之蓮嚟講，價錢係有啲意外，意外地唔算好貴，係貴得嚟好合理嗰種~
冇諗過喺機場可以食到一餐咁好食嘅中餐~
食完嘢就去返我哋晏晝坐嘅地方傾吓偈~
傾到夠鐘 check-in 就一齊行過去~
Check-in 時問吓地勤座位嘅問題，雖然知道 99.99% 唔可以免費調，都問吓啦~
結果都係要加錢先可以改位，咁由佢啦，都唔係咩大問題嘅~
Check-in 完就要同媽咪分開了~
後記：
今次嚟日本，感受最深係日本服務員嘅態度，真係差咗好多~
可能近年實在太多西客~
但連豐田服務態度都差，真係有啲難接受，不過嗰個應該唔係日本人~
但又咁講，咁嘅人都請？
人流嚟講，比預期少好多，特別係冇乜見到中國人~
不過又咁講，本身呢個時候就係超淡季，人流少都算係正常~
咁冇乜人再加上冇乜嗰啲人，又係幾舒服嘅~
今次我哋冇帶相機，純用手機影相，真係超級輕鬆~
不過呢，啲相就真係同相機影嘅爭勁遠~
點都好，試過都係返唔到轉頭，嗰種輕鬆感真係無得頂~
喺寫呢篇後記時，啲相機已經賣晒，原來仲值啲錢~
兩年前返過香港一次，今次返香港，冇諗過會有咩變化，但感覺上係有啲唔同~
香港啲嘢貴咗好多，係明顯貴過兩年前~
地鐵站啲工作人員多咗好多，感覺唔係咁需要，但點解會咁呢？
沒有留言:
發佈留言