今日行程：
【大阪】木津市場 → 無限ラーメン 新今宮駅前店(早午餐) → スーパーキッズランド本店 → 一味禪(午餐) → Street Kart Osaka → 道頓堀大観覧車 → 道頓堀 → モリタ雲丹五郎 大阪本店(晚餐)《住宿：アパホテル＆リゾート〈大阪なんば駅前タワー〉》
今日起身好返好多，確定可以出去玩~
不過由於未完全冇事，都係休息多陣好啲~
直至 hea 到 09:30，我突然醒覺，10:00 要 check-out 喎，唔係好似噚日咁，咩都唔駛理喎！
嗱嗱聲彈起身刷牙洗面，仲有因為噚日唔舒服，所以摷過嘅嘢好亂，唔係要執返整齊咁簡單，係要正式執行李走人~
一輪操作下，都趕得切 10:00 check-out，跟手寄存埋行李~
期間動作之快，就好似開咗條片，但調較到 4 位速咁~
爆衝完一輪，加上噚日食咗好少嘢，身體又開始恢復緊，而家好需要補充體力，去食早餐先~
木津市場
木津市場擁有超過 300 年歷史，係日本最大規模嘅私營批發市場之一，每日都有由全國各地運到嘅海鮮、蔬菜、生果同高級和牛。
本來計劃係一早去木津市場嗰間「海鮮丼専門店 木津 魚市食堂」食海鮮丼，不過我咁晏先過去，預咗想食嘅已經賣晒，不過都想過去睇吓~
去到門口，有少少人排緊隊，亦都一如所料，想食嘅海鮮丼已經售罄~
其實其他嘢都吸引，不過吸引還吸引，胃口上又好似唔係好想食~
於是就走入市場望吓~
入面啲嘢都唔算細份量，唔係食唔晒，一個人點會食唔晒一板海膽？
問題係，花咁嘅錢一個人啃晒成板海膽，對我嚟講係浪費，浪費金錢亦浪費咗板海膽~
仲有其他嘢食嘅，不過都係同一個問題，冇細份嘢，冇得試吓唔同嘅嘢，最後乜都冇買到~
諗諗吓，冇喺度買到嘢食，再加上本來噚日會去嘅餐廳又冇去到，不如食兩餐啦，一餐早啲當早午餐，一餐晏啲當午餐~
就住地點順路情況，去食拉麵先~
餐廳開 11:00，我行到去係 10:58，等咗一陣就入得~
無限ラーメン 新今宮駅前店
雖然我嚟到時冇人等，但我入咗座後 5 分鐘，已經有十個客，好似幾受歡迎~
牛骨鶏白湯
湯底可揀普通或者濃郁，我揀咗濃郁~
呢碗係喺菜單入面相對比較少份量嘅，因為晏啲仲要食第二餐，而家唔可以食太多~
湯底非常濃郁，但一啲都唔膩口~
牛肉入口即化，雞肉就鞋咗啲~
麵質少少彈牙，表面亦相當順滑~
跟住就照預定咁行去大阪市天王寺動物園~
行到一半，突然心血來潮走去睇吓 google comment，comment 話園內有好多工程，又話指示唔清晰，同埋有部份動物冇得睇~
綜合資訊，我決定唔去，行吓模型舖算，反正時間唔算太多~
原定計劃亦有大阪市立美術館，不過今日咁晏出門口，仲要食兩餐，其實我冇咁多時間完成計劃好嘅行程~
但其實動物園同美術館都係攝時間景點，冇時間要攝，就自然可以唔去~
而家行去模型店睇吓車，希望唔會太衝動走去買~
經過見到間 Figure 店又就走入去睇吓~
發覺自己完全唔識認動漫嘅角式，而且都冇乜興趣~
途經一個上高速位，一啲都唔起眼~
如果唔熟路跟地圖行，我覺得好大機會會錯過~
呢次旅程，我一直都有留意有關只有日本出售嘅 Kit Kat 朱古力，因為我有個同事好鍾意食 Kit Kat，仲成日請我食，所以我想喺日本買啲日本限定嘅 Kit Kat 俾佢~
我已經睇中咗買咩，但我知道日本隨手都買得到，所以冇諗住咁早買~
經過一間藥妝店，又走入去睇吓有咩 Kit Kat 產品賣，俾我見到我本身想買嗰盒 Kit Kat，半價發售，所以就喺度買咗先~
スーパーキッズランド本店(Super Kids Land 本店)
幾層樓都係賣 Figure 同唔同種類嘅模型~
呢度都幾多嘢睇，不過我咩迷都唔係，所以唔算興奮~
係對車有少少興趣，有時都想喺屋企擺啲鍾意嘅車款模型，不過其實我知我唔會咁做，又要錢又要空間又要打理，仲可能買咗返嚟其實都冇覺得好開心~
最後都只係 window shopping~
唔同層有唔同規矩，有啲成層唔俾影相，有啲就只有某啲產品可以影相，有啲成層都可以影相~
行完之後又去食嘢~
一味禪
呢度通常要排隊，不過我嚟到時冇人排，但入面係滿座嘅~
初時唔知門口喺邊，仔細啲睇，原來所有門都係門口，邊度有位就開邊度門入~
大海老天丼(大蝦天丼)
・大海老天ぷら2匹(大蝦天婦羅2隻)
・野菜の天ぷら(蔬菜天婦羅)
・チクワの天ぷら(竹輪天婦羅)
・餅の天ぷら(麻糬天婦羅)
都係揀咗份份量比較少嘅，胃口方面冇問題，實食得晒~
1100 円連前菜同麵豉湯，超抵食~
即叫即炸新鮮熱辣，啱啱炸起嚟講，佢真係算乾身，一啲都冇油膩感~
蝦夠新鮮又大隻；野菜都有幾款真係食得好開心；竹輪同麻糬天婦羅都係第一次食，好特別~
平靚正！👍
食完嘢行出嚟，見到對面有雪糕賣，仲要係我幾鍾意嗰款，諗住買杯嚟食，點知行到埋去，有告示話雪糕機清洗中，無緣~
而家冇乜嘢做，都知道差唔多要同屎塔匯合，我哋從未約定邊度匯合，因為之前時間同地點都唔定，都係到時佢送咗朋友上車就通知我再約~
我知道佢會送佢朋友到南海電鐵難波站搭車，所以我打算行去南海電鐵難波站附近等佢~
喺南海電鐵難波站附近，見到有座夾公仔機中心，我知屎塔要扭好多蛋送俾人，所以就入去望吓會唔會有好多扭蛋機，因為呢度有成幾層樓，可能有一層會係扭蛋機？
原來低幾層係夾公仔機，再上係機舖，頂層係影貼紙相嘅，即係成座嘢都冇扭蛋機~
上到貼紙相嗰層，全部十幾歲𡃁妹化緊妝，我出現喺嗰度相當尷尬，即閃~
之後約咗屎塔喺難波公園 Loft 匯合，匯合後見有時間就慢慢行吓~
行完就去旅館 check-in 先~
我今日條腰超攰，可能噚日瞓得太多~
由同屎塔匯合後到 check-in，大家都超 hea mode，完全冇留意時間已經悄悄留走~
而下個要去嘅地方，係預先預約好，講明唔可以遲到嘅，我突然發現，時間原來超緊迫~
嗱嗱聲乜都唔理，爆出門口，急步行過去~
到目的地時係 16:00，預約時間都係 16:00，冇遲到，仲超準時~😎
Street Kart Osaka
之前去東京玩過，個 course 係 3 個鐘嘅，不過大阪呢度就只得 1 個鐘 course~
玩之前都係聽對方講解吓啲流程同安全事項~
東京玩係夜晚，會經過東京塔、渋谷最繁忙路，仲會上埋彩虹橋行到 70km/h，相當刺激(亦都相當危險)，好不過癮~
今次大阪最主要經過道頓堀同通天閣，同東京嗰次真係冇得比~
但過程仍然相當愉快，只係 1 個鐘實在太少，感覺好快就完~
同我哋一齊玩嘅有四個泰國人，但我幾相信佢哋係兩對唔同 party 嚟，因為唔見佢哋有傾偈，只係見到佢哋聽講解時係用泰文翻譯~
不過有個唔係幾跟規矩，造成一定困擾~
行車時要一加接一架，一前一後成一行直線，有個人唔知點解，長期偏右貼住右邊行車線行車，其實咁樣係會對右一條線嘅車做成困擾~
停車時就要左一架右一架咁一齊停，一條行車線係好輕鬆咁夠停兩架 kart 仔，嗰條友有時停車位置係霸佔咗右邊線一部份行車線~
有時啲人嘅行為，就係不能理解，我相信問佢本人，佢都解釋唔到~
玩完就要決定去邊，本來計劃去通天閣嘅，同時亦都想坐道頓堀 Donki 摩天輪~
兩邊都去唔係唔得，但今晚預約咗晚餐餐廳，變咗而家去玩就要限時限刻控制住時間~
我哋未搭過 Donki 摩天輪，唔知會唔會係要排長龍嘅項目，所以最後決定唔去通天閣，輕輕鬆鬆行吓道頓堀算~
Donki 大観覧車
景就......冇乜~
行咗陣 Donki 同道頓堀，周圍都人山人海，冇乜 mood 行，時間又未到就冇靈魂咁喺外圍周圍行，行到真係唔想行就搭車過去食晚餐嘅地方~
搭地下鉄過去之後仲要行 10 分鐘先到~
モリタ雲丹五郎 大阪本店
都係睇人哋啲片介紹，主要係食海膽嘅~
佢有唔同套餐，咁我都幾相信多數人第一次嚟都係食佢最人氣嘅套餐~
我哋係第一個到，跟住就有一對男女嚟到，坐喺我哋隔籬，應該係香港人嚟~
跟住陸續都有人到，總共 9 個客~
廚師問其中一對客人來自邊度，對方答香港；廚師再問另一個 party 三個客人，對方答香港~
廚師再問我隔籬嗰對男女，對方答香港；最後，廚師問埋我哋，我哋答香港~
原來全X部香港人~😂
相信大家都係睇咗同一條片嘅介紹而嚟~
現今世代......都唔知係好事定唔好事嚟~
大家都係預訂咗同一套餐~
人氣 No.1 套餐
〜贅沢・雲丹鍋コース〜
〜奢華・海膽鍋套餐〜
已經唔記得叫咗咩嘢飲~
⚫︎雲丹ホタテの炭焼き
雲丹、ホタテ貝柱、海苔、大葉
⚫︎炭烤海膽扇貝
海膽、扇貝貝柱、海苔、大葉
廚師對每位客人展示今晚會用嘅海膽~
廚師會用燒到通紅嘅木炭壓住扇貝嚟焫熟佢~
海膽甘香 creamy，扇貝新鮮有鮮味，加埋紫菜同大葉，有種清新味道~
⚫︎新"うにく"
雲丹、A5黒毛和牛
⚫︎新"海膽和牛"
海膽、A5和牛
隻蛋黃靚到呢~~~
廚師話要撈勻佢再捲嚟食~
呢個味道幾複雜吓，有滿滿嘅蛋黃香味，和牛入口即化，再加上海膽嘅甘甜，好味道！
⚫︎雲丹プリン
⚫︎海膽布丁
海膽固然好味，但個布丁就冇咩特別，食完已經冇乜感覺~
⚫︎贅沢・雲丹鍋 〜海鮮〜
雲丹、伊勢海老、アワビ、はまぐり
旬のお野菜
⚫︎奢華・海膽鍋 〜海鮮〜
海膽、伊勢蝦、鮑魚、蛤蜊
當季蔬菜
先上一鍋湯底，廚師再手動攪爛啲海膽壓落鍋度~
啲海鮮夠晒份量~
廚師一口氣講晒落料次序同埋要等幾耐先可以食，跟住佢就離開咗現場~
我就覺得呢度有少少美中不足，好難一次過記得住佢講啲咩，如果可以留喺現場照顧吓會比較好~
所以最後啲嘢食未必可以按照廚師心目中嘅火喉嚟煮~
伊勢蝦肉質彈牙且結實，味道相當鮮甜，仲好似有啲回甘咁~
鮑魚軟稔但有質感，口感好獨特，味道偏向甘甜，可能因為個湯底~
蛤蜊彈牙但爽口，咬落去會爆汁，好鮮甜~
⚫︎贅沢・雲丹鍋 〜お肉〜
A5黒毛和牛ロース
熊本県産"りんどう"(豚肉)バラ、ロース
旬のお野菜
⚫︎奢華・海膽鍋 〜肉類〜
A5和牛肉
熊本產"鈴蘭"(豬肉)五花、肉片
當季蔬菜
剩返嘅湯用嚟做 shabu shabu 嘅湯底~
A5 和牛入口即溶，雖肉味唔算濃郁，但有湯底嘅甘甜搭夠~
豬五花肉油脂香味豐富；豬肉片肉味濃厚~
⚫︎〆 雲丹リゾットor雲丹パスタ
⚫︎結尾 海膽燉飯或海膽義大利麵
我同屎塔都揀咗海膽燉飯(Risotto)，但其實可以全都要，仲可以揀份量，不過我哋覺得都差唔多，所以就冇太貪心~
繼續用盡個湯底，用埋嚟煮飯~
煮完就加芝士，廚師會不停刨啲芝士落碗飯度，直至我哋叫停佢先會停~
最後就加埋海膽，禮成~
初時有啲怕會勁鹹，因為個湯收汁後，一次比一次鹹，到最尾，啲飯索晒啲湯汁，應該會幾鹹吓~
但食落又一啲都唔覺太鹹，好神奇，仲幾好味添~
⚫︎デザート
⚫︎甜點
士多啤梨甜度十足，外層相信係糯米製成嘅麻糬皮，夾埋口感特別又好食~
同埋我幾鍾意佢隻碟，光線穿過隻碟出嚟嘅影幾靚~
啲雪條基本上係任攞嘅，咁當然正常都應該一條起兩條止啦~
總括嚟講，堅係好食，係有高一層次嘅感受，亦都可以話好滿足~
不過我個人比較唔鍾意同廚師有過多嘅交流，好似時刻要留意佢咁，又怕做咗啲咩(又或者忽略咗佢)講咗啲咩令佢覺得唔尊重~
對我嚟講，係唔可以盡情享受，多少有點抗拒感~
食完嘢就搭地下鉄返旅館~
屎塔同我匯合前，同朋友去咗食蟹~
かに・ふぐ専門 蟹吉 なんば道頓堀
沒有留言:
發佈留言