《瞬間看地球》Stranger's Blog: 2026.02.08 滋賀県(大津、高島) (日本第五天)

今日行程：
【滋賀】琵琶湖觀景台 → 白鬚神社 → らーめん与七堅田店(午餐) → 綠水亭(晚餐)《住宿：雄琴溫泉琵琶湖綠水亭》

早餐旅館包埋，上次食過 Route-Inn 嘅早餐，相當好，今日呢間都係 Route-Inn 集團其中一間，有啲期待~
我本來以為同集團，啲早餐會係一樣，點知有一半都唔同，但一樣好食~
嚟緊仲有機會住第三次 Route-Inn，期待~

食早餐嘅時候，見到出面落雪，好過落雨嘅，雖然今日有個行程係需要好天氣，但冇好天氣，配搭飄雪都 OK~

琵琶湖觀景台
這裡是一個可以將日本第一大湖「琵琶湖」的壯麗景色盡收眼底的絕美景點，特別適合看日出或日落。觀景台最著名的設計就是其無邊際水池步道，水池的湛藍與遠處的琵琶湖、天空連成一線，讓人彷彿置身於雲端。

去觀景台中途，天色開始轉暗並且落雪(早餐時只係落咗幾分鐘雪，之後停咗)，但唔大，冇陽光就上去睇雪景都好~
去到停車場閘口，小姐嘗試觀察我部車條胎，我話係雪胎佢先放我上去~
初時都冇乜嘢，行咗幾百米，天氣急速轉差，大風又大雪~
泊好車嘅時候，已經達到暴風雪嘅級數，好唔想落車......

落咗車之後，所有風雪都係向住面部打埋嚟，一係強忍前進，一係背住行，但我哋行緊馬路，實在唔可能背向咁行，只好強忍前進~
行到去見到部巴士，咦，大路嚟喎，唔見有售票處，唔通過咗籠？唯有行返轉頭睇吓~
行返轉頭嘅時候，風向改變，啲雪一樣兜口兜面咁打埋嚟......😖
沿路完全唔覺有其他路，又行返轉頭~
哈，風向又變，啲雪繼續兜口兜面咁打埋嚟......😭
直至行返去部巴士度，我知道發生咩事喇~
我之前以為部巴士係由其他地方載人到售票處，其實唔係，佢係由停車場載人到售票處，即係我哋要搭呢部巴士先去到售票處~

去到售票處，見到 Terrace + Snow Land 5000 円，咁貴嘅，Snow Land 係咪即係滑雪咖，咁我哋唔滑雪會唔會平啲？
排隊問吓，唔滑雪都係 5000 円，只上觀景台嚟講，太貴喇，加上而家天氣真係好差，其實上嚟都冇意思，決定唔上，行吓個商店就離開~
喺行商店時，其實冇真正睇嘢，個腦諗緊唔上觀景台，去邊好~
我記得另一邊山區有兩個觀景台路邊，可以考慮吓~
不過好快就打消諗頭，咁大風雪就要避免上山，同埋都唔會有咩景睇，嘥氣~
咁去下個景點先，之後再算~

對比一吓剛到達售票處同行完商店嘅分別，少過 30 分鐘嘅時間，已經完全兩個世界，好大風，啲雪係向住面部咁打埋嚟~

對比一吓剛到達停車場同回程攞車時嘅分別，可能只係 30 分鐘嘅時間~

真係好誇張，完全冇諗過會遇到咁嘅天氣~

補兩張琵琶湖觀景台官網嘅相記錄吓~

其實我連下個景點都唔想去，咁大風雪可能冇嘢睇，又唔係近，同埋本身個景點都唔算吸引，只係冇地方去先至去~
但唔去又真係冇地方去，點打發時間？所以都過去睇吓啦，可能比想像中好呢~

白鬚神社
白鬚神社最出名嘅就係矗立喺琵琶湖入面嘅大型鳥居，因為呢個景觀同廣島縣嘅嚴島神社非常相似，所以佢又有「近江之嚴島」嘅美譽。
由於鳥居面向東方，清晨可以睇到太陽由鳥居後方升起；黃昏時分，湖水同天空嘅顏色變化亦非常壯觀。

跟導航行咗啲細路，細路完全見唔到地面標示，亦冇車行過嘅痕跡，雪不斷累積，我初時係慢慢揸，但我知道唔盡快出返大路，被困機會會越嚟越高，我盡量揸快啲，要喺積雪過深時離開小路~
好衰唔衰，去到某段路，導航叫我直去，但我見到禁止進入牌，我附近周圍都係小路，積雪真係好深，我唔敢亂行，只好靠屎塔利用 google 帶路，我心底知道呢啲情況只有運氣救到我，因為 google 導航唔會因應大雪而有所改變~
一路快速但小心咁行，仲俾我行到去啲單線雙程嘅路，遇到對頭車真係唔知點算~
咁大風雪，啲雪會累積得好快，我喺日本東北同英國都經歷過呢種情況，好短時間內啲積雪已經可以對行車構成威脅，何況而家其實已經構成威脅並且落雪嘅情況完全冇減少嘅迹象，我絕對不能怠慢~

哈，真係開口中，有對頭車呀~😭
萬幸我同佢之間係一間唔知係住宅定公司嘅停車場出入口，敵不動，咁我動囉，我扭入去等佢過咗再倒車返出嚟~
再行咗幾分鐘，終於都出返大路，成個人由終極繃緊變放鬆~
喺大路某啲路段，車流相當慢，好事嚟，我呢刻真係想慢慢揸，因為嗰種猶有餘悸嘅感覺尚未完全退去~
非常感恩我訂咗雪胎，否則今日被困小路嘅機率極高~

去到目的地其實真係唔想落車，又凍又痛(啲雪打埋塊面度)，咁來都來了，當然唔會就咁走人~

呢邊應該大風雪咗唔係好耐，地面未算積面~

以前冇呢個觀景台，但由於太多人冒險過馬路影相，所以起咗呢個台，同時禁止橫過馬路過對面~

白鬚神社速影~

距離旅館可以 check-in 仲有好多時間，但咁嘅環境真係邊度都唔想去~
有啲運仔嘅係，今日本身都係得 15:00 前嘅行程，因為 15:00 我哋會去溫泉旅館，直至聽朝~
咁而家去食嘢先，睇吓食完咩時間再算~

本來計劃係去食一間高分寿司店，不過而家想食碗熱辣辣嘅拉麵多啲，所以就喺地圖搵咗間高分拉麵店~

らーめん与七堅田店

店外只得幾個車位，我去到時好彩仲有一個位~
入到去係要自己喺部機度買嘢食，之後就會有人帶位~
當刻店入面連等位都冇，叫我哋上返自己部車度等~
等咗 10 分鐘到，就有人出嚟叫我哋入去~
入到去要排龍尾，但坐咗 1 分鐘，就安排我哋坐去隊頭~

とん玉(豚玉)

あさチャ(朝茶)

其實落單當刻唔知道兩者有咩分別，淨係知道肉量同有冇蛋嘅分別~
結果都係一樣，一樣嘅湯底，一樣嘅豚肉~
湯頭濃郁但係一啲都唔會過鹹亦一啲都唔膩，唔會食到尾段有太膩唔想食嘅感覺~
濃郁但清爽？可唔可以咁形容？呢種感覺存唔存在？
總之個湯係堅好味~
麵身偏硬都幾好食~
豬肉同脂肪比例唔錯，味道出色~
呢兩碗拉麵相當唔錯，尤其喺咁嘅天氣底下，特別好食~

本來諗住早啲去旅館等 check-in，不過屎塔話想去藥妝店，仲搵咗一間去旅館中途經過嘅~
行完藥妝店，開車到旅館啱啱好 15:00，完美~

雄琴溫泉琵琶湖綠水亭
被安排了泊有瓦遮頭位置，咁聽朝咪唔駛鏟雪？正喎！

泊好車就有人過嚟幫忙拎行李，入到旅館即時被安排去接待處隔籬大廳坐低，一人一杯茶，再等人過嚟幫忙 check-in~

等咗唔係好耐，有位著和服嘅年輕女士走埋嚟介紹自己~
之後就跪喺地下開始進行 check-in 程序同介紹旅館~
過程中，多謝唔該唔好意思加埋講咗幾十次，其實我哋都聽到有啲唔好意思~
佢一直笑容滿面，自然大方又莊重，其實感覺都幾舒服，講少啲多謝唔該唔好意思會更好~
之後就帶我哋上房，途中帶我哋去攞浴衣，好多款，任揀~
一路都係佢推住行李車幫我哋運行李，去到房後，佢幫我哋拎行李入房時，我同佢講好重，等我拎就可以了~
佢笑容可掬地回覆一句：It's perfect for me
佢唔係隨口噏，佢一手拎篋，一手拎背囊，超強！
如果我自己拎，我都會一手拎篋，一手拎背囊，不過分兩次做~🙃

今晚呢間係溫泉旅館，book 咗房內有私人溫泉，15:00~10:00(+1)，瘋狂浸，不脫皮不罷休！
我只係住過幾間房內有私人溫泉嘅旅館，呢間都算最冇私隱~

下圖(係明朝嘅相嚟)左邊係浴室，右邊係溫泉~
先唔講個簾嘅私隱度，講吓兩者之間冇簾嘅部份~
由浴室走過溫泉時，係會經過大約 1 尺嘅冇遮擋位，設計者點解會設計成咁嘅呢？點解唔將溫泉嗰邊嘅簾做闊啲呢？
又或者用其他設計去填補呢個缺憾呢？當然，可能喺設計者眼中，呢個唔係缺憾嚟~
再講簾嘅部份，呢種簾本身係幾好嘅，望出去穿透性高，遠處望入嚟我相信係咩都睇唔到~
咁，舊時嘅望遠鏡呢？現時嘅變焦儀器呢？其實可能已經可以佢眼望我眼~